IA-p inuttut pisinnaatitaaffiit pillugit attuumassuteqanngitsumik sullissivimmik pilersitsisoqarnissaa kissaatigaa
- Inuppassuarnut eqquinerluttussaasoq isumaqarpunga. Meeqqat 15.000-iusuni 5000-it inuttut pisinnaatitaaffitik atuutinneqarnissaanut ajornakusoortittarpaat, saniatigullu aamma innarluutillit eqqarsaatigissavavut, Aaja Chemnitz Larsen oqarpoq.
Kalaallit Nunaanni inuttut pisinnaatitaaffiit pillugit siunnersuisoqatigiit 2012-imi pilersinneqartoq 17-nik ilaasortaatitaqarpoq, Nunanut allanut pisortaqarfimmi maanna allaffeqarfeqarpoq, siunnersuisoqatigiillu Danmarkimi inuit pisinnaatitaaffiinik sullissisut Institut for Menneskerettigheder, suleqatigalugit nunatsinni inuit pisinnaatitaaffii eqqortinneqarnersut misissortarpaat.
Suliarli politikkikkut arlaannaannulluunniit attuumassuteqannginnissaa pisariaqartoq, Inuit Ataqatigiit isumaqarput, taamaammallu inuit pisinnaatitaaffii pillugit sullissiviliornissamik siunnersuuteqarput.
Siunnersuullu Inatsisartuni ullumi siullermeerneqarpoq.
Naak partiit tamarmik, Naalakkersuisut ilanngullugit, tunngaviusumik isumaqataagaluarlutik, siunnersuut partiit naalakkersuisuutitaqartunit itigartinneqarpoq, Kalaallit Nunaanni inuttut pisinnaatitaaffiit pillugit siunnersuisoqatigiit nalilersorneqaqqaarnissaat kissaatigineqarmat
.Læs også Inuit pisinnaatitaaffiinut siunnersuisoqatigiiffik pilersinneqalertoq
Nalilersueqqinnissaq naammagineqarnngilaq
- Nalilersuisoqarnerani takorusupparput, inuit pisinnaatitaaffii sukkut nukittorsassanerlugit. Taamaammat Naalakkersuisuninngaanniit nalilersuisoqaqqaarnissaa innersuussutigerusupparput, Pinngortitamut, avatangiisinut Inatsisinillu Atuutsitsinermut Naalakkersuisoq, Mala Høy Kuko taama oqarpoq.
Nalilersuineq 2017-imi pisussaagaluartoq, Inatsisartut 2016-imi upernaakkut ataatsimiinnginnerini pisussanngorpoq. Inuit pisinnaatitaaffiisa siuarsarneqarsinnaaneri pillugit Inatsisartuni apeqquteqaat aallaavigalugu oqallisissiassamut nalilersuineq tunngaviusussaavoq.
Siunnersuut akuerineqassaguni 500.000 koruuninik akeqarnissaa naatsorsuutigineqarmat aamma akuerineqanngikkallarpoq
- Naalakkersuisoqarfinni Inatsisartoqarfinnilu sipaarniaqqusaavugut, aningaasallu suminngaanniit aaneqassanersut aamma paaserusupparput, Mala Høy Kuko oqarpoq.
Aaja Cemnitz Larsenip tamanna paasisinnaavaa.
- nunarput aningaasaateqarpallaannginnera unammillernarsinnaavoq. Taamaammat siunnersuutit tamarmik sipaarniarneq pissutigalugu itigartinneqarsinnaapput. Aningaasat suminngaanniit pissarsiarineqassanersut naluara, taamaammat ataatsimiititaliami oqallisigineqarnissaa pingaaruteqarpoq, Aaja Chemnitz Larsen oqarpoq.
Nalilersueqqinnissarli nuannarivallaanngilaa.
- Naliliisoqaqqinnissaanut innersuussisoqarnera ajuusaarutigilaarpara. Inuimmi pisinnaatitaaffii pillugit siunnersuisoqatigiit tusarsimasuugaluarunikku suliaat suli nukittorsarneqarsinnaagaluartut isumaqarpunga, Aaja Chemnitz Larsen oqarpoq.
Siunnersuut Partii Naleqqamit taperserneqarpoq.
Aaja Chemnitz Larsenip siunnersuutaa naalakkersuisullu allannguutissatut siunnersuutaat inatsisinut ataatsimiititalianut innersuunneqartussanngorpoq. Siunnersuullu Inatsisartuni apriilip 29-ani aappassaaneerneqassaaq.
