Inuit pisinnaatitaaffiinut siunnersuisoqatigiiffik pilersinneqalertoq
Nunatsinni inuit pisinnaatitaaffiinut siunnersuisoqatigiit pilersinneqartussanngorpoq. Ippassaq sisamanngornermi Inatsisartut inatsisissatut siunnersuut akueraat taamaalilluni 'Inuit Pisinnaatitaaffiinut Kalaallit Nunaata Siunnersuisoqatigiivi' pilersinneqartussanngorluni. Inatsiseq akuerineqartoq 2013-imi januarip aallaqqaataani atuutilissaaq.
-Inatsisikkut siunertaavoq Kalaallit Nunaanni Inuit Pisinnaatitaaffiinut Kalaallit Nunaata Siunnersuisoqatigiivinik arlaannaannulluunniit atanatik siunnersuisoqatigiiusunik pilersitsinikkut inuit pisinnaatitaaffiinik siuarsaanissaq illersuinissarlu, taakku peqatigitillugu Kalaallit Nunaanni ataatsimut isigalugu inuit pisinnaatitaaffii pillugit ilisimasanik piginnaasanillu annertusaaqataassammata, taama inatsisissamut siunnersuutip nassuiaataani allaqqavoq.
Siunnersuisoqatigiit Kalaallit Nunaanni inuit pisinnaatitaaffeqarneranni pissutsit pillugit nakkutilliinermut nalunaaruteqartarnermullu peqataasassapput. Inuit pisinnaatitaaffiinut tunngassuteqartunik naliliisarluni misissuinernik ilisimatusarnernillu suliaqarnissat oqallisigisarnerisigut peqataasassapput.
Inuit pisinnaatitaaffii pillugit paasissutissiissutinik ingerlatitseqqittarnermut peqataassallutik. Inuit pisinnaatitaaffiinik ilinniartitsineq tapersersorlugu siuarsarlugulu aamma Kalaallit Nunaanni inuit pisinnaatitaaffiisa nukittorsarneqarnissaannut suliassanik siunnersuuteqartassallutik.
Siunnersuisoqatigiit ilaasortalersorneqassapput soqutigisaqaqatigiiffinnit, pisortat suliffeqarfiutaannit, peqatigiiffinnit kiisalu pisortani oqartussaasunit inuit pisinnaatitaaffiinik sulisaqartunit toqqarneqartunik.
Inuit Pisinnaatitaaffiinut Kalaallit Nunaata Siunnersuisoqatigiivinut aningaasartuutit ukiumut 900.000 koruunit missaaniittassapput. Aningaasat taakku ataatsimiinnernut, angalanernut aamma ullormusianut kiisalu paasisitsiniaanermut aningaasartuutinut atorneqartassapput.
