Kristian Jeremiassen: Taamaammat partiimut allamut nuuppunga
Inuit Ataqatigiit Inatsisartuni kommuninilu ukiuni kingullerni sulinermi politikkiat isumaqatiginartikkamiuk
Inuit Ataqatigiinnut ilaasortaalernini Kristian Jeremiassenip oqaatigaa:
- Inatsisartuni kommunalbestyrelsimilu ukiut kingulliit sulinerat, partiillu politikkia inuiaqatigiinnut ukiuni makkunani pitsaasutut nalilerpara, inuillu ikiorneqartussat eqqarsaatigalugit, Qaasuitsullu kommunalbestyrelsiani toqqissilluni ingerlatsisoqarnissaa inuiaqatigiinnut pingaartutut isigigakku taamatut aalajangerpunga, Kristian Jeremiassen oqarpoq.
AAMMA ATUARUK Jeremiassen IA-nngorpoq
Taassuma Siumut sinnerlugu Inatsisartuni ilaasortaagallarami Inuit Ataqatigiit sakkortuumik ilaatigut isornartorsiortarpai, aperaarpullu maanna taava sooq Inuit Ataqatigiinnut ilaasortanngornersoq:
- Inuiaqatigiit pillugit oqallittarsimavugut, taamaalilluta inuiaqatigiini aaqqiiniarneq qitiutittarsimallutigu. Imaanngilaq akerleriittuaannaraanni akerleriinneq naassaanngitsumik ingerlassasoq. Inuit Ataqatigiit akornanni ilaasortanik ukiut kingulliit oqaloqateqartarnera aamma annertusimavoq, Inuit Ataqatigiit sinnerlugit Qaasuitsup Kommuniani kommunalbestyrelsimi ilaasortanngortoq Kristian Jeremiassen, Qanoruumut ippassaq taama oqarpoq.
Inuit Ataqatigiit sinnerlugit Qaasuitsoq Kujallermi Ikaarsaariarnermi ataatsimiititaliami ilaasortat taamaasillutik
8-put, ikaarsaariarnermilu ataatsimiititaliami ilaasortat katillutik 15-iummata Inuit Ataqatigiit amerlanerussuteqalerput.