IA-p naalakkersuinikkut pissaanillit avoqqaarai
Namminersorlutik Oqartussat Naalakkersuisullu kanngunartuliamit nutaamit nalaanneqaqqipput.
Tassami AG allappoq Naalakkersuisut siulittaasuata Naalakkersuisoqarfiani inatsiseqarnermut pisortap, Andreas Salmonyp, allagaatinik takunnissinnaatitaanermik piumasaqarnermut tunngatillugu malittarisassanik allaanerusumik paasinninnissamut akerliunini pissutigalugu ingerlaannartumik juunip qaammataani sorarsitaavoq.
Taama pisoqarnera IA-mit maanna akuliuffigineqarpoq. Tassami illuatungiliuttut partiianni gruppip siulittaasuata, Agathe Fontainep tikkuarpaa, politikerit inatsisinik unioqqutitsinnginissaat atorfilittat suliassarpiarigaat.
-Unioqqutitsilluni suliaqartoqarneranik erseqqissaateqarneq pissutigalugu soraarsitsisoqartalissappat ingasappallaassaqaaq, Agathe Fontaine oqarpoq.
Taamatut soraarsitsisoqartarneratigut Nunatta pikkorissunik sulisussarsisinnaanerata ajornarnerulersinnaanera annilaanngatigaa.
- Namminersorlutik Oqartussani atorfilittanik pikkorissunik sulisoqarusuppugut. Suliatigullu ilinniarsimasat malinniarnerat pissutigalugu soraarsitaasoqartalerpat, atorfilittanik pikkorissunik nunatsinni sulisussaqarnavianngilagut.
Namminersorlutik Oqartussani tusagassiinermi ataqatigiissaarisutut atorfiup allagarsiunneqarnerata pimoorussassaannginneranik AG-p qulaajaalluni paasisaqarsimanera Agathe Fontainep aamma isornartorsiorpaa. Allagaatinik takunnissinnaatitaanikkummi paasineqarpoq, Julie Rademacker, qinnuteqarnissamut ulluliussaq sapaatit akunneranik sioqqullugu, atorfininnissaanik neriorsorneqareersimasoq.
- Atorfinitsitsisoqassatillugu malittarisassat malinneqartussaapput. Naalakkersuisunut tunngatillugu aamma taamaattariaqarpoq. Taamatut pisoqavissimassappat, kusanaalluinnartuussaaq akuerineqarsinnaananilu, IA-p Inatsisartuni gruppiani siulittaasoq taama oqarpoq.