IA: Naalakkersuisoqatigiinnissamut isumaqatigiissuteqariartorpugut
Siumut nunatsinni partiini annerpaatut sapaatip akunnerata siuliani uppisinneqarpoq.
Inuit Ataqatigiit Múte B. Egede siuttoralugu Namminersornerullutik Oqartussat 1979-imi piviusunngortinneqarneranit aatsaat aappassaanik Naalakkersuisuni siuttunngoriartorput.
Naalakkerusisoqatigiinnik suli pilersitsisoqanngilaq. IA-lli siulittaasuata oqarnera naapertorlugu partiit tamarmik oqaloqatigereernerisigut isumaqatigiinnerit naammassiartulerput.
Inatsisartuni atuuffiit 31-upput.
Partii naalakkersuisoqatigiilluunniit amerlanerussuteqassagunik 16-inik atuuffeqassapput.
Inuit Ataqatigiit 12-inik qinigaatitaqarput.
Siumut qulit.
Demokraatit pingasut.
Naleraq sisamat.
Atassut marlunnik qinigaatitaqarpoq.
Nunatta Qitornai Suleqatigiissitsisullu Inatsisartunut qinigaatitaqanngillat.
- Oqaloqatigiinnerit suli ingerlapput, aammalu isumaqatigiinninniarnerit ingerlaqqiffissaannut ikaarsaariartoratta massakkut tassunga tassani killiffeqarpugut. Qilanaarpugut neriulluarpugut inuiaqatigiit ataatsimoorfiinik aallaavilimmik siulersorneqarnissaat ukiunilu sisamani atasussanik naalakkersuisunik patajaatsumik ingerlatsisunik pilersitsinissaq taanna neriulluarfigalugu aamma, Múte B. Egede KNR-imut oqarpoq.
Demokraatit isumaqatigiinniarnerni tallimanngormat peqataajunnaartut
Demokraatit IA-mut oqaloqatigiinnerit partiinit siulliullutik peqataajunnaarput. Siulittaasup, Jens-Frederik Nielsenip oqarnera naapertorlugu Demokraatit IA-lu assigiinngippallaarnerat pissutaavoq.
- Qineqqusaarneq kingumut qiviarutsigu isertuussassaanngilaq partiit ungasittorujussuusugut, taanna tunngaviuvoq. Partiitut nunap qanoq aqunneqarnissaa sumullu ingerlanissaa assigiinngitsorujussuarmik tunngaveqartumik politikkeqarpugut, taamaattumik soorunami demokraatit naalakkersuisoqatigiinnut ilaanissaa tutsugivinartuunavianngilaq. Assigiinngissutigut amerlasuutigut annertuallaarput, kisianni aamma oqaatigaarput, suleqatigiissinnaavugut arlalitsigut, tassanilu suleqatigiinnissamut suleqatigiinnissamut piareersimajumaarpugut, Jens-Frederik Nielsen oqarpoq.
Partiit allat – tassa Siumut, Atassut Nalerarlu suli isumaqatigiinniarnerni ilaapput.
AAMMA ATUARUK IA-p siulittaasua: Tamassinnut qujanaq!
Siumulli siulittaasua, Erik Jensen isumaqatigiinniarnernut tunngatillugu oqaaseqarpallaarsinnaanngilaq.
- Torersumik pitsaasumillu ingerlappagut. Soorunami assigiinngitsorpassuartigut suleqatigiissinnaavugut, kisianni aamma aporfeqarpoq. Aammali sammisanik maqaasisaqarpugut, isumaqatigiinniarnerilli tusagassiuutitigut ingerlassanngimmata oqaaseqarfiginianngilara, Erik Jensen oqarpoq.
Naalakkersuisoqatigiinnut sisamanik amigaateqartut
Múte B. Egedep kikkut suleqatigerusunnerlugit erseqqissumik oqaatiginngilaa.
Ataaserli qularnanngilaq: IA Inatsisartuni aqqaneq-marlunnik qinigaatitaqarpoq. Naalakkersuisoqatigiit amerlanerussuteqarnissamut 16-iussapput. Taamaammat Múte B. Egede ikinnerpaamik sisamanik suleqatissarsissaaq.
Naleraq sisamarluinnarnik qinigaatitaqarpoq. Nalerarlu IA-tulli Kuannersuarni aatsitassarsiornissamut suliniummut, tassa aatsitassanik qaqutigoortunik piiaanermi aamma uranitalinnik piiaanermut akerliusuuvoq.
Hans Enoksen Naleqqami siulittaasoq oqarpoq:
- Anguniakkagut assigiittorujussuupput, qineqqusaarnemri immitsinnut tapersersortugut ersarissorujussuuvoq. Aamma immikkoortunut akerleriiffigisaqanngilagut. Taamaammat oqaloqatigiissinnaasugut qularnanngilaq.
Siumut aatsitassarsiornissamut suliniummut tapersersuisuuvoq – Atassullu innuttaasunut taasititserusulluni.
AAMMA ATUARUK Múte B. Egede: Nalakkersuisuliorniarnermi immikkortut aappaat allartippoq
- Qineqqusaarnermi partiit ersarissuliortut apeqqummut tassunga arlaliupput. Inuit Ataqatigiit aammalu partiit allat akerliusut imaluunniit Kuannersuarnut apeqqummut apeqqusiisut massakkut amerlanerussuteqarlutik inuiaqatigiinniit taaneqarput.
Taassuma Kommune Kujalleq innersuussutigaa, tassani Siumut borgmesteriutitaqarunnaarpoq, IA-lu qinigaalluarluni: IA Kommune Kujallermi Siumumut qinersisartuusimasut affaannit amerlanerusunit taaguunneqarpoq.
Siumut 15 procentpointimik kinguariarpoq innuttaasullu 40 procentiinit taperserneqarluni.
Naalakkersuisoqatigiit sapaatip akunnerata naanerani piariissasut
Inuit Ataqatigiit Narsami Kuannersuit inissisimaffigisaani siuariarnerpaavoq.
Partiit pingasut maannamut matut suli matuneqanngitsut oqaatigivaat. Isumassinni qanittut qanillereerpisigit?
- Inuit Ataqatigiinni pingaarnerpaarpaaq tassa nunatsinni torersumik patakaatsumillu aalaqqajunngitsumik siuttuuneq uagut pilersikkusukkipput, taanna siulliuvoq. Taavalu tullerivaa inuiaqatigiit inuit ulluinnarni atugaasa massakkut unammillernangaatsiartumi inissisimareertut taakku pitsanngorsarnissaannut anersaaqarluni sulinissaq. Pingajuattullu inuiaqatigiinni avissaartuuffigisimasagut soorlu apeqqutit Kuannersuartut ittut unitsillugit ataatsimoorfigut aallaavigalugit sulilernissarput.
AAMMA ATUARUK Siulersortitut assaqqoqut Mútemeereerpoq
- Tassanilu takusinnaajartorparput aamma partiit sorliit tassunga peqataanissaminnut piareersimanersut.
Naalakkersuisoqatigiit qaqugu missaani saqqummiunniarpisigit?
- Oqaatiginikuuara tassa uuma qaammatip qiterpaareernerata kinguninngua naatsorsuutigalugu piareersimassalluta, Múte B. Egede.
