Múte B. Egede: Nalakkersuisuliorniarnermi immikkortut aappaat allartippoq
Inatsisartuni amerlanerussuteqarumagaanni ilaasortat 16-iusariaqarput.
Inuit Ataqatigiit Inatsisartuni issiavinni 31-iusuni aqqaneq marluk ingiffigisussaagamikkit, Naalakkersuisunngortitsiniarunik taasisinnaasunik sisamanik pisariaqartitsipput.
Taamaammat partiip siulittaasua, Múte Bourup Egede, Inatsisartuni partiit allat tulleriiaarlugit qinersinerup aqaguani oqaloqatigilerpai.
Oqaloqatigiinnerit pituttuisuunngillat, Naalakkersuisoqatigiiliornissamulli siulittaasup tunngavissaanut tikkuussisuussallutik.
-Suleqatigiiffiusinnaasut qanoq ittuusinnaanerinik oqaloqatigiinnerit pituttuiffiunnginnerusut aallarniutigisimasavut tunngavigalugit imminut uterfigeqqinnissarput tassa tullinnguupparput, Múte Bourup Egede oqarpoq nangillunilu:
AAMMA ATUARUK Múte B. Egede apriilip qiteqqunnerani isumaqatigiissusiussangasoq
- Taavalu qanoq ingerlariaqqittoqassanersoq taasuma kingorna tikkuussikannileriartuaassaaq, aamma oqaloqatigiinnerit qanoq allatut nangeqqinneqarsinnaanersut tassannga paasineqarumaarluni.
Taava partiit ataatsimiinnernit oqaatigineqartut qanoq isummerfigissaneraat tullinnguuppoq:
- Pissangagivara, partiit taakku oqaloqatigisimasavut qanoq apuussassaqarumaarnersut, aammalu uaugut partiinut soorunami apuussassaqarpugut, qanoq ingerlariaqqissagutta tunngaviit suut aallaavigeriarlugit oqaloqatigiinnerit nangeqqissinnaanerannut kissaateqarnersugut.
Demokraatit isumaqatigiinniaqataajunnaartut
Demokraatilli oqaloqatigeeqqinnissani peqataassanngillat.
Partii taanna IA-mut naalakkersuisoqataaniarnani erseqqissaasoq Sermitsiaq.AG, allappoq.
- Nunamut atatillugu pingaarnertut siunnerfiginiakkavut isumaqatigiissutigisinnaanngilagut, taamaammallu naalakkersuisooqatigiissinnaanerput attanneqarsinnaanavianngilaq.
Partiilli siunissami suleqataasinnaanini siulittaasulli mattutinngilaa.
- Demokraatit suliassaqarfitsigut arlaliusutigut sunniuteqarsinnaassappata politikkikkut isumaqatigiissuteqarsinnaapput aamma isumaqatigiissutigineqartut nunap ajunngitsumik ingerlalernissaanut atuutissappata, taanna oqarpoq.
