Múte B. Egede apriilip qiteqqunnerani isumaqatigiissusiussangasoq
Qinersereernermi naluneqanngitsutut Naalakkersuisoqalertarpoq.
Pissanganngeqqaalaarallarilli, inuummi qitiusup, Múte B. Egedep, oqarnera naapertorlugu Nalakkersuisoqatigiinnik ilisarititsinissaanut sivikinnerpaamik sapaatit akunnerat ingerlaqqaassaaq.
Inuit Ataqatigiit siulittaasuat Qanoruumi taama ippassaq unnukkut oqarpoq.
- Pisariaqartipparput ullorpaalunnguani suli oqaloqatigiinnivut ingerlalluassallugit suleqatigiittussallu pilersissallugit. Qaammatip uuma qiterpaareernerata isumaqatigiissusiorsimanissarput naatsorsuutigineqassaaq, taanna oqarpoq.
Taanna aamma partiit allat aallarniutaasumik pituttuiffiunngitsumillu aallarnisaataasumik ippassaq oqaloqatigisimallugit, oqaloqatigiinnerillu arfernup missaani naammassisut, oqaluttuarpoq.
- Tassa oqaloqatigiinnivut massakkut ingerlappavut; sumiinnerluta aammalu sunik aporfeqarsinnaanerluta. Massakkut oqaloqatigeereernerít kingorna qularnanngilaq tamatta angerlarluta tunuliaquttatsinnut apuussissuugut, IA-p siulittaasua oqarpoq.
AAMMA ATUARUK Naleraq isumaqatigiinniarnissamut piareersartoq
Taassuma partiit assigiinngitsut ulluni aprilip 15-ata tungaanut oqaloqatigisaqattaassavai.
- taamaalillutalu piffissami qanittumi oqaloqatigiinnerit ineritaqarfiusut aammalu isumaqatiginninniarnerit ilumut kikkut suleqatigisinnaannerlugit aammalu suleqatigiinneq ataqqeqatigiinnermik, torersumik aammalu naaperiarsinnaanermik tunngaveqartoq - aammalu ukiuni sisamani naalakkersuisooqatigiinnik atuuttussanik pilersitsinissamut tunngavissiisinnaasoq, innuttaasunut torersumik ingerlatsinissap tunngavissinnissaanut sulissuugut, Múte B. Egede oqarpoq.
Inuit Ataqatigiit aqqaneq marlunnik taasisinnaasortaqarput, Inatsisartunilu amerlanerussuteqarumallutik sisamanik allanik pisariaqartitsipput.
Naleraq sisamanik tasisinnaasoqarpoq, partiillu taakkua qineqqusaarnermi qitiulluinnartut ilaannut, tassalu Kuannersuarnut tunngasuni, isumaqatigiipput.
Partiit marluullutik aatsitassarsiornissamik pilersaarut unitseqquaat, taamaammallu Naalakkersuisoqatigiilissanersut oqallisaavoq.