Naleraq isumaqatigiinniarnissamut piareersartoq
Hans Enoksen Naleqqami siulittaasuusoq unnuaq sinippianngilaq.
Naleraq 12 procentinit tassa 3.249-nit Inatsisartunut taaguunneqarpoq, Inatsisartunullu sisamanik isertitaqarluni.
Nalerarlu Inuit Ataqatigiit naalakkersuisoqatigiilertussanik ujartuinissaannut soqutiginarpoq.
Inuit Ataqatigiit aqqaneq-marlunnik qinigaatitaqarput. Taakkulu Inatsisartunut amerlanerussuteqalissagunik 16-inik qinigaatitanik naalakkersuisoqatigeeqassallutik, aqqaneq-marlullu sisamanik ilagunik 16-iulertussaapput.
Naleqqakkut Inuit Ataqatigiinnut isumaqatiginninniarnissaminnut aggersarneqarnissaminnik maanna neriullualereerput.
- Massakkumut suli aallartittoqanngilaq, kisianni uagut nammineq ilutsinni eqqartuillattaarpugut isumaqatiginninniarnissat eqqarsaatigalugit, Hans Enoksen KNR-imut oqarpoq.
Naleqqap isumaqatigiinniarnerit 'torersumik ingerlanneqarnissaat' taamaallaat kissaatigaa, siulittaasuata oqaatigaa.
AAMMA ATUARUK Inatsisartunut qinikkat ukuupput
Hans Enoksenilli isumaqatigiinniarnerit suli aallartinnginnerat pissutigalugu suut isuleqatigiissutigisinnaanerlugit maannangaaq oqaatigisinnaannginnerarpai.
- Taakku massakkut oqaatigisinnaanngilakka, aamma siulersuisuunerit ataatsimiitseqqaartussaavagut qaaqquneqarutta, taava suut tunngavissanerigut. Partii siulersuisuuneqarput taannalu tunngavigalugu sulissaagut, suliareqqusaasut naammassiniarlugit, Hans Enoksen oqarpoq.
Naleqqap Inuit Ataqatigiillu ataaseq isumaqatigiissutigilluarsinnaavaat: Tassa nunatta kujataani Kuannersuarni suliniuteqarnissamut naaggaarnissaq.
Tamanna Ilisimatusarfimmi inuiaqatigiilerinermut ilisimatuup, Rasmus Leanderip nalilerpaa.
- Kuannersuit qineqqusaarnermi oqallisaaqaaq. IA tamatumani ersarittorujussuarmik inissisimasarpoq. Inatsisartunut qinigaatitaqarnerpaaginnarani Kujataani kommunimut aamma qinigaatitaqarnerpaavoq. Tamanna Kuannersuit pingaaruteqarnerannik aamma ersersitsivoq, taanna oqarpoq.
Taassuma naalakkersuisoqatigiinnik pilersitsinissamut periarfissat assigiinngitsuunerarpai, taamaakkaluartorli IA-p Naleqqallu naalakkersuisoqatigiilernissaa ilimanarnerpaatut maannakkut isigalugu.
Nalerarlu Inatsisartunut qinersinermi taaguunneqarnerpaat pingajuuvoq.
Inuit Ataqatigiit naalakkersuisoqatigiinnik pilersitsisinnaassaguni 1979-imit aatsaat aappassaanik Siumut Naalakkersuisuni siulittaasuussanngilaq. Inuit Ataqatigiit 2009-mit 2013-imut naalakkersuisunut aamma siuttuupput.
