Siulersortitut assaqqoqut Mútemeereerpoq
Inuusunnermini Qaqortumi arsaattarfimmi illersuisuni naalagarsuartut ilisimaneqarpoq. Manchester Unitedinilu illersuisuulluni.
34-nik ukiullip Miki Jensenip, kammanni Múte Bourup Egede taama eqqaamasaqarfigaa. Taanna Inatsisartunut qinersinermi qinerneqangaatsiarluni Naalakkersuisunut siulittaasunngorsinnaanissaminut inissisimalerpoq.
- GU-miinnitsinni arsaqatigiittarnikuuvugut. Ilaannikkut ajugaarusulluni killissaminik qaangiilluni, forsvariulluarniarami, ilaannikkut aamma arsaattarfimmi naalagaasarnikuuvoq.
AAMMA ATUARUK Múte taaguunneqarpaavoq Kim Kielsenilu taaguunneqarnerpaat tulliulluni
Eqqaamavara aamma Manchester Unitedinik illersuisuusoq, uanga taannartaa iluarinngeqaara, arsenaliugama,
Múte B. Egedep Qaqortumi ilinniarnertuunngorniaqatigisimasaa arsaqatigisartagaalu Miki Jensen taama oqarpoq.
Sakkortooq tupassaarisartoq
Taakku ilinniarnertuunngorniarnerminni Inuusuttut Inatsisartuinut 2007-imi peqataapput. Múte B. Egede-llu Inuit Ataqatigiinni siuttuni akuujartuaarnera Miki Jensenip taamanerniit malinnaaffigaa. Miki Siumumi allatsiuvoq ilaatigullu imatut oqaasertaliivoq:
- Maluginiarpara ukiuni kingullerni politikip tungaatigut ineriartorsimanera assut malunnarpoq. oqallorinnera ammalornerusumik immaqa aamma oqariartuuteqartarnera massakkut aamma malunnarpoq. Qinigaaffimmi qaangiuteqaammersumi aamma illuatungiliuttuulluarpoq. Immaqa taamatut oqariartuuteqarsinnaavunga, uanga Siumumi allatsitut atorfeqaraluarlunga kisianni tassani killissani qaangertaraluarlugit sakkortuunik oqariartuuteqartarami, Miki Jensen oqarpoq.
Múte Bourup Egedep politikikkut misilittagai
Múte B. Egede 1987-imi Nuummi inunngorpoq, Narsami peroriartorluni.
Taanna Qaqortumi ilinniarnertuunngorniarfimmi 2007-imi naammassivoq, ukiorlu taanna inuusuttut Inatsisartuinut peqataalluni.
Nuummi ilisimatusarfimmi, inuiaat kulturiannik oqaluttuarisaanerannillu 2008-mi ilinnialerpoq, taassuma suliffeqarfiutitaarnissani anguniarlugu ilinniarnini 2013-imi taamaatippaa. Suliffeqarfik 2016-imiit 2017 tikillugu ingerlappaa.
Inuit Ataqatigiit siulersuisuuneranni 2013-imi taana ilaasortanngorpoq.
Múte B. Egede Inatsisartunut 2014-imi qinigassanngortippoq, 82-inillu taaguunneqarluni. Taamani qinersisai amigarmata isinngitsoorpoq.
Taanna Inuusuttut Ataqatigiinni 2013-imiit 2015-imut siulittaasuuvoq.
IA-meersorlu Mimi Karlsen napparsimanini peqqutigalugu 2015-imi sulinngiffeqalermat, Inatsisartunut iserpoq.
Múte aatsitassanut 2016-imiit 2018-imu naalakkersuisuuvoq.
Taassuma saniatigut qaammatini pingasuni kommuninut, nunaqarfinnut, isorliunerusunut, attaveqaqatigiinnermut ineqarnermullu 2018-imi naalakkersuisuuvoq. Tassani Martha Lund Olsen kommunimut qineqqusaarnissani peqqutigalugu naalakkersuisuuffimminit tunuarmat taama pisoqarpoq.
Múte Bourup Egede Inut Ataqatigiinni 2018-imi siulittaasunngorpoq
Ukiorlu taanna Inatsisartunut 233-nik taaguunneqarluni.
Ukiorlu manna Inatsisartunut qinersinermi taaguunneqarnerpaalluni 3380-inik taaguunneqarpoq.
Tusarfik: KNR.gl
Tassuuma Múte politikeriunera ikinngutaanera nikinganeqartinngilaa.
- Partiip torsuusaani aamma tusaamanerlutaavoq tupassaarisarnera, taamaattumik aamma nuannertarpoq, taanna oqarpoq.
Meeraallunili nalunngikkai
Múte B. Egede politiki inuuneranup ilaalluinnartoq, anaanaata Ellen Bang Bourupip oqaatigaa.
- Pingasut missaanni ukioqarluni politikerit atii taakkartorsinnaasarpai, ilaannikkut tupaallannalaartarluni, toqqannaq ilitsersunngikkaluarlugu, kisianni malinnaanermigut alapernaannermigut naluneq ajorpai. Taava aamma ikinngutinilu immaqaluunniit najani peqatigalugu Qanoruukkoortuusaartarput politikertuusaarlutik, aappaa apersuisoq aappa akisartoq, karsit filmiliutitut atorlugit Qanoroortuusaartarput. Anaanaasoq taama oqarpoq erninilu ima siunnersorusullugu:
- Uanga ernera imatut siunnersorusuppara: Kinaassutsini attatiinnassagaa, nunamullu tunngassalluni. Pisarnermisullu inoqatiminut saamasuulluni qanilaartuulluni, peqatigalugit oqaloqatigalugillu tusarnaarlugit pissasoq. Kinaassuserput nunamullu tunngasuunerput qimakkutsigu kinaassuseerutissagatta. Tassa kinaanini sorlaqarfinnilu eqqaamajuaannassagai, taana oqarpoq.
Partiip aallarniisua tulluusimaartoq
34-nillu ukiulip Múte Bourup Egedep politikkimik suliaqarnemini suliat maannamut annersaat, naalakkersuisoqatigiiliorniarneq, Nalakkersuisunut siulittasunngorneranik inerneqarsinnaasoq, oqqumukartuusilluni maanna ingerlaarfigaa.
AAMMA ATUARUK Múte B. Egede apriilip qiteqqunnerani isumaqatigiissusiussangasoq
Múte Bourup Egedellu suliani 34-nik ukioqarluni nunatsinni siuttuni inuusunnerpaasussaangaluartoq, IA-mik pilersitseqataasup, Aqqaluk Lyngep, suliaq iluatsissinnaaga quluarutiginngilaa:
- Múte B. Egedep Inuit Ataqatigiit anersaavat qangali pigisaasoq, aatsaat taama erseqqitsigisumik kinguaariinnut nutaanut anngutilerpaa. Kalaallit Nunaannullu nutaamut aaqqissuussinissamini tamanna anersaaq anersaariguniuk angusarissaartorujussussaaq, Inuit Ataqatigiinni aallarnissoq, Aqqaluk Lynge oqarpoq.