Politikki Inuussutissarsiutit

Aningaasanut inatsit 2015 IA: Kisitsisit ilai kusassarneqarsimarpasipput

Inuit Ataqatigiit siammasissumik suleqatigiinnissaq pingaartinnerarlugu arlaleriarlutik oqaatigisareeraluarlugu aningaasanut inatsisissatut siunnersuummut aqagu tamakkiisumik akuersinavianngillat, kisitsisit ilaat kusassarneqarsimaneri ilaatigut pissutigalugu, Inuit Ataqatigiit siulittaasuat Sara Olsvig oqarpoq

Allattoq Ivik Kristiansen, Peter Bye Andersen

maajip 11-at 2015 17:02

- Aningaasanut inatsimmi immikkoortortarpaaluit akuerseqataaffigalugit aqagu taasisussaavugut. Kisianni aningaasanut inatsit ataatsimut isigalugu akuerseqataaffigissanngilarput. Tassanilu pissutaasoq annerpaaq tassaavoq aaqqissuusseqqinnermi sunniutissat naatsorsorneqarneranni kisitsisit kusassagaavallaartutut, tunngavilersorluagaanngitsutullu isigigatsigit, Sara Olsvig oqarpoq.

Siusinaarluni soraarnerussutisiaqartanermi aaqqissuusseqqinniarneq inatsisinik allanngortiterineruinnaasutut, taamaattumillu aaqqissuusseqqinneruviunngitsutut Inuit Ataqatigiit isigimmassuk, akuersiniannginnerannut ilaatigut pissuteqartoq, Sara Olsvigip oqaatigaa.

Aamma atuaruk Martha: Sulisinnaajunnaarnersiuteqartut sulilersinneqassapput

- Taamaammallu suliaq ataqatigiissagaanngilaq, aammalu kommunit qanimut suleqatigineqartussaagaluartut suleqatigineqaratik suliarineqarpoq. Kisittalu aamma taamatut isumaqarpasinngilagut. Ataatsimiititaliap taassuminnga suliaqartup aamma suliarineqarnissaa ukiamut kinguartippaa, taamaasillutillu takutillugu Naalakkersuisuniit suliaq saqqummiunneqartoq eqqarsaatigilluagaasimanngitsoq, Inuit Ataqatigiit siulittaasuat oqarpoq, ilanngullugulu oqarpoq Pituffimmi kiffartuussinissamut isumaqatigiissutip Greenland Contractorsimit annaaneqarneranut atatillugu aningaasat Nunatta karsianit annaaneqartussanut naatsorsuutigisanik 2014-imili kingullermik takusaqarluni.

Aamma atuaruk Pituffimmi kiffartuussinissamik isumaqatigiissutip annaanera inuussutissarsiornermut eqquinerlussaaq

- Taamaakkaluartoq aningaasanut inatsimmi annaasaqarnissamut kontoq Naalakkersuisunit saqqummiunneqaraangat kisitsisitai allanngorartarput. Kisitsisit taakkua, isaasalerlugu, atornerlullugit kusassaaginnartoqartoq amigartooruteqannginnissamut atornerluinertut tamanna uatsinnut takussutissaavoq, Sara Olsvig oqarpoq.

Taamaasillutik Inuit Ataqatigiinniit siammasissumik suleqatigiinnissamut oqariartuuteqaqattaarnikuugaluarlutik aningaasanut inatsisissatut siunnersuummi tamakkiisumik akuersinianngillat.

Aamma atuaruk IA: Nunatta aningaasaqarnera pillugu suleqataarusuppugut

- Immikkoortorpassuarni naapinniarpugut, aamma aqagu taaseqataaniarpugut. Kisianni inatsit tamakkiisoq isigalugu, kisitsisit tutsuiginannginnerat uagut peqataaffigisinnaannginnatsigu akuersilluta taasissanngilagut, Sara Olsvig oqarpoq.

Partii Naleqqap aningaasanut inatsisissamut siunnersuut akuerissaneraa paasiniaraluarparput, oqaaseqartitsisinnaasimanatali.

Aamma atuaruk 2015-imut aningaasanut inatsit Partiit oqaluuserisassaat