IA: Nunatta aningaasaqarnera pillugu suleqataarusuppugut
Partiip Aningaasaqarnermut ataatsimiititaliami ilaasortaatitai Sara Olsvig, Naaja H. Nathanielsen aamma Peter Olsen ataatsimoorlutik tusagassiuutinut nalunaarumminni taama allapput.
- Suleqatiginnikkusulluni assamik isaassineq tikilluaqquarput, aningaasartuutitalinnillu siunnersuuteqassagaanni suminngaaniit aningaasalerneqassanersut tikkuusseqqaartarnissaq isumaqatigivarput, IA ilaasortat allapput.
Taakku nuannaarutiginerarpaat Naalakkersuisoqatigiit isumaqatigiissutaanni neriorsuuterpassuit akisoqisut suminngaaniit aningaasaliiffigineqarnissaannik tikkuussaqarnani, 2015-imut Aningaasanut Inatsisissamut ilanngunneqarsimanngimmata.
IA-p ilaasortaat aamma allapput, akileraartarnikkut aaqqissuusseqqinnissamik pilersaarut ilanngimmat, naak sulineq imminut akilersinnaasariaqartoq kissaatigineqaraluartoq.
Inuussutissarsiutinik ingerlatsiniartunut pitsaasunik atugassaqartitsinissamik anguniagaqarneq eqqaaneqanngilarluunniit, allaat aningaasanut inatsisissamut 2016-imut tunngasumi.
Sanaartornermut tunngasuni inissianut, 130 millionit sipaarfigineqarput, taamatuttaarlu kolligialiornissamut aningaasanik nassaartoqarsimanani, Inuit Ataqatigiit sinnerlugit Inatsiartunut ilaasortat taama allapput.