Inuussutissarsiutit

Pituffimmi kiffartuussinissamik isumaqatigiissutip annaanera inuussutissarsiornermut eqquinerlussaaq

Nunatta karsia nunatsinnilu inuussutissarsiornermut suliat eqqugaassapput Greenland Contractors Thule Airbasemut isertitsinarluartumik isumaqatigiissut annaammassuk.

Allattoq Jonas Løvschall-Wedel

novembarip 06-at 2014 10:12

Nutserisoq Tikaajaat kristensen

Greenland Holdingip, nunatsinni inuussutissarsiornermut aningaasaliisartup Greenland Contractorsip pingajorarterutaa pigaa. Ukioq kingulleq taama piginninneq 65 millioninik isertitsissutaavoq.

Taamaalilluni Greenland Holdingip sinneqartoorutaasa, ukioq kingulleq 68 millionit koruuniusut, annerpaartai tammarput.

- Ilumoqqinnaaq. Ukioq kingulleq katiterneqarneratut iinnassappat, sinneqartoorutitta annersaraat, Greenland Holdingimi pisortaq Karsten Høy oqarpoq.

Aamma atuaruk Pituffimmi kiffartuussinissamik isumaqatigiissutip annaaneqarnera politikerit ernumanartoqartikkaat

Taassuma ilanngullugu oqaatigaa Greenland Holding Namminersorlutik Oqartussanit pigineqartoq ukiuni kingullerni pingasunik tapersiisimasut.

- Soorunami malunnaatilimmik nunatta karsianut sinneqartoorutitsinnit tapiisimavugut. Aappattullu sinneqartoornitsinnit akileraarnitsigut aamma tapiisimalluta. Naggataagullu aallarniisunik sulianullu pitsaasuusinnaasunik inuussutissarsiornerup siuarsarneranut Greenland Venture aqqutigalugu tapersiisimavugut.

Ukioq kingulleq sinneqartoorutaannarnit 30,5 millionit koruunit Greenland Holdingimit nunatta karsianut tunniunneqarput.

Aamma atuaruk Greenland Contractors Pituffimmi sullissiunnaassaaq

Karsten Høyip erseqqissaassutigaa, siunissami isertitassat annikillisussanngornerisa kingunerissagaa Greenland Holdingip maannatut tapiisarsinnaannginnera.

- Taamaalilluni suliffissanik nutaanik pilersitseqataasinnaanerput kingusinnerusumi aatsaat pisussanngorpoq. Anguniakkagut angussaqqaarpavut, taamaaliorniaruttali piffissaq annertunerusoq atortussanngorparput.

Amerikamiut suliffeqarfiat Vectrus sinaakkuserneqartut iluanni taama aallaanerutigisumik siunnersuummik saqqummiisinnaanerat ilimagisimanngikkaluaramikku ajuusaarnaraluaqisumik assullu naalliummeernartumik Thule Airbasemut isumaqatigiissut annaagitsik Karsten Høyip oqaatigaa.

- Uagutsinniimmi akikinnerujussuusimapput. Misigisaq nuanninngilaq, inernerusumummi assut tupaallaqqavugut. Karsten Høy oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.