Greenland Contractors Pituffimmi sullissiunnaassaaq
MT Højgaardip aviisimut Børsenimut tamanna oqaatigaa.
MT Højgaardip Pituffimmi sakkutooqarfimmut sullissinissamik isumaqatigiissutaa kingulleq ukiuni qulini atuutereersoq, 2015-imi septembarimi naasussaavoq, nutaamillu suliariumannittussarsiuussinermi suliffeqarfik peqataaqqammerluni.
Maannali MT Højgaardip nalunaarutigaa, Greenland Contractorsip isumaqatigiissutini nutartertussaajunnaaraa, allumullu isumaqatigiissuteqartoqartoq.
- US Air Force-imik suleqateqarnerput ukiorpassuarni ingerlalluarsimagaluarpoq, - tassami 1971-imiilli suleqatigaavut, MT Højgaardimi pisortaq Peter Kofoed Radioaviisimut oqarpoq.
- Nutaamik isumaqatigiissuteqannginnerput uggoreqaarput, suliarpummi nuannarigaluaqigatsigu, taanna ullumi taama oqarpoq.
Tamatumunnga taarsiullugu Amerikamiut suliffeqarfiutaat nunani tamalaani sullissisartoq, Vectrus nutaamik isumaqatigiissuteqarfigineqarpoq, suliffeqarfiup suliffeqarfiutaa Danmarkimiittoq qularnanngitsumik aqqutigalugu.
Suliffeqarfiup nittartagaani www.vectrus.com- imi ullumi oqaatigineqarpoq, issuaavunga "Danmarkimi suliffeqarfik Vectrusimit pigineqartoq, Pituffimmi sullissinissamik isumaqatigiissummik, USA-mi illersornissamut ministereqarfimmut 411 millionit dollarsinik nalilimmik isumaqatigiissuteqarpoq." issuaaneq naavoq.
411 millionit dollarsit koruuninngorlugit 2,4 milliardit koruuniupput. Vectrusip Pentagonillu isumaqatigiissutaat 2022-mi septembarip tungaanut atuuppoq.
Isumaqatigiissut nutaaq pillugu Amerikamiut suliffeqarfiutaat Vectrus KNR-imit ullumi annerusumik oqaaseqartissinnaasimanngilarput.