Pituffimmi kiffartuussinissamik isumaqatigiissutip annaaneqarnera politikerit ernumanartoqartikkaat
Sullissinissamik neqerooruteqartuni Amerikamiut kiffartuussinermut suliffeqarfissuat Vectrus ajugaasuuvoq, taakkumi Greenland Contractorsimit akinik appasinnerusujussuarnik neqerooruteqarnermikkut toqqarneqarsimapput.
AAMMA ATUARUK Greenland Contractors Pituffimmi sullissiunnaassaaq
IA-meersut Sara Olsvigip aamma Naaja Nathanielsenip tamatuma Nunatsinnut qanoq kinguneqarnissaa ernumanartoqartippaat. Tamatumunnga atatillugu Greenland Contractorsip Nunatta karsianut ukiorpassuarni pingaaruteqarnera erseqqissarpaat, akileraarutinit isaatitsiviummat aamma suliffeqarfinnik siuarsaasussatut suliffeqarfimmut "Greenland Holding"-imut aningaasalersueqataammat aamma suliffeqarfik inuusuttorpassuarnut ilinniartunut praktikerfissaqartitsisarmat.
Taakku apeqqutigaat, Greenland Contractorsip isumaqatigiissutaata ingerlateqqinneqarnissaa Naalakkersuisunit sulissutigineqarsimanersoq, aamma isumaqatigiissut nutaaq Danmarkip USA-llu illersornissamut isumaqatigiissutaannut naapertuuttuunersoq apeqqutigalugu.
Kalaallit folketingimi ilaasortaatitaat marluusut Doris Jakobsen aamma Johan Lund Olsen pineqartoq pillugu Danmarkimi nunanut allanut tunngasunut ministerimut Martin Lidegaardimut aamma apeqquteqareerput.
AAMMA ATUARUK Pituffimmi GC-mi sulisut soraarsitaanissartik ernummatigissanngilaat
Doris Jakobsenip kiffartuussinissamik isumaqatigiissut nutaaq piumasaqaatigineqartunut naapertuuttuunersoq apeqquserpaa.
- Isumaqatigiissut nutaaq Danmarkimut Nunatsinnullu akisoorujussuussaaq, Doris Jakobsen oqarpoq, pissusissamisuunnginnerarlugulu qallunaat kalaallillu suliffeqarfiat Pituffimmit anisitaasussanngormat, naak USA-p nunarsuatsinni sumi tamaani sakkutuuliisarnerinut Danmark tapersersuilluni sakkutuuliisaraluartoq.
Tamatuma peqatigisaanik Johan Lund Olsenip aalajangiinerup Nunatsinnut kingunerisassai Martin Lidegaardimut nassuiaqquai, Greenland Contractorsillu isumaqatigiissuteqarfigineqarsimannginnera pillugu Danmark ilisimatinneqarsimanersoq paaserusullugu.
