IA: Hardenberg aqutsinermi malittarisassanik unioqqutitsivoq

Aaja Chemnitz Larsen, Inuit Ataqatigiit sinnerlugit Inatsisartut Nunanut allanut Sillimaniarnermullu ataatsimiititaliaanni ilaasortaasoq, Svend Hardenbergip pingasunngormat "atorfimminit tunuartitaareersorlu", Naalakkersuisunut arlalinnik apeqquteqarpoq.
februaarip 26-at 2015 07:16
Nutserisoq Simon Uldum -

Naalakkersuisoqarfimmi pisortap namminerisaminik e-mailini atorlugu Nick Nielsen (S) naqqiissuteqarfigigamiuk Naalakkersuisut siulittaasuat sinnerlugu allagaqarnini sooq erseqqissaatigisimannginneraa paaserusuppaa. Aamma atorfilittat taamatut allagaqarsinnaanerat namminerisamillu mailimit taamatut nassuissisinnaanerat Kim Kielsenip (S) qanoq isumaqarfigineraa paaserusuppaa.

AAMMA ATUARUK Hardenberg atorfeqarnerani oqallisaasarpoq aporaaffiusuni

Hardenbergip naqqeeqqusilluni e-mailernera pivoq, Nick Nielsen (S) Folketingimi oqallittoqarnerani arlaleriarluni oqarmat, Pituffimmi kiffartuussinissamik isumaqatigiissummut tunngatillugu suliami Naalakkersuisut danskillu nunanut allanut tunngasunut ministereqarfiat qanittumik suleqatigiissimasut.

AAMMA ATUARUK Hardenberg naalakkersuisoqarfiup pisortaatut atorfimminit tunuartinneqarpoq

- Isumaga naapertorlugu atorfilittap, allaat nunap atofilittaasa qaffasinnerpaavata, immaqalu allagaatinik takunnissinnaatitaanerup atuutinnginnissaanik siunertaqartumik, taamatut tunngaviusutut aqutsinermi malittarisassanik unioqqutitsinera akuerineqarsinnaanngilaq, Aaja Chemnitz Larsen oqarpoq nangillunilu.
 
- Erseqqissumik saqqummiunneqartariaqarpoq taamatut iliorneq taannatuaanersoq imaluunniit siusinnerusukkut aamma pisarsimanersoq.