Hardenberg atorfeqarnerani oqallisaasarpoq aporaaffiusuni
Svend Hardenbergimut unnerluussissutit piffissami kingullerni amerlapput, tamannalu suliunnaaralllartinneqarneranik naggaserneqarpoq.
Atorfimmit tunuartinneqarallarneqarneranik taasaq pillugu inuttaasunut paasissutissanik annertunerusunik soqanngilaq. Naalakkersuisut aamma Namminersorlutik Oqartussat oqaluttuanngillat sooq Naalakkersuisut siulittaasoqarfiani Naalakkersuisoqarfiup pisortaa atorfimminit tunuartinneqarallarnersoq.
AAMMA ATUARUK Hardenberg naalakkersuisoqarfiup pisortaatut atorfimminit tunuartinneqarpoq
- Suliaq inunnut ataasiakkaanut tunngassuteqarmat, Naalakkersuisut Siulittaasuata Naalakkersuisoqarfia annertunerusumik oqaaseqarsinnaanngitsoq, Sulisoqarnermut aqutsisoqarfik taama allappoq, nunatsinni naalakkersuisoqarfiit qullersaanni pisortap Svend Hardenbergip soraarsitaanera pillugu.
Søren Hald Møller Naalakkersuisut Siulittaasuata Kim Kielsenip Naalakkersuisoqarfiani pisortaagallartussatut atorfinitsinneqarpoq, maannamut Aatsitassanut tunngatillugu Avatangiisinut Aqutsisoqarfimmi pisortatut atorfeqarsimasoq.
Svend Hardenberg naalakkersuisoqarfimmi pisortatut atorfeqarnermini oqallisaasarpoq suliffigisimasaminilu kukkussuteqartarsimavoq.
Nukissiorfimmi pisortaanermini biilinut, oqarasuaatinut qarasaasianullu attaveqaatinut nammineerluni atuisarnera pillugu annertuunik aningasaartuutaasimavoq.
Naalakkersuisut siulittaasoqarfiani maanna pisortatut suliunnaartoq aporaaffiusuni arlalinni akuusarpoq, tassalu Kalaallit Nunaata Københavnimi Sinniisoqarfiani pisortamik aamma aningaasaqarnermut naalakkersuisoqarfimmi pisortamik atorfinititsiniarnermi aporaaffioqisumi annertuumik sunniuteqarpoq.
Aningaasaqarnermut Naalakkersuisoqarfimmi pisortaq Carsten Frank Hansen ullut ikittuinnaat atorfeqareerluni soraarsitaavoq, taamani politiit Carsten Frank Hansenimut tunngasunik misissuimmata, taava Aviâja Helms Kalaallit Nunaata Københavnimi Sinniisoqarfiani pisortassatut atorfinitsinneqarnermi kingorna tunuarpoq, atorfinitsinneqarneranut periuserineqartoq qularnartoqartinneqarmat, atorfinititsinerillu taakkua marluk Svend Harderbergip annertuumik sunniuteqarfigai. Carsten Frank Hansen kingusinnerusukkut politiinit pinngitsuutinneqarpoq.
Pisut kingulliit annertuumik isornartorsiorneqarput
Tassalu Pituffimmi kiffartuussinissamik isumaqatigiissutip neqeroorutigineqarneranut tunngasoq.
Harderbergip atorfeqarunnaarneranut tunngassuteqartoq naammassineqangimmat annertunerusunik paasissutissanik tunniussisoqarsinnaanngitsoq Namminersorlutik Oqartussani atorfilik KNR-imut oqarpoq.
Naalakkersuisut siulittaasuat Kim Kielsen aamma Svend Harderberg KNR-imit oqaaseqartinniarneqaraluarput tamannali ilutsissinnaasimangilaq.
