Kalaallit Danmarkimi inuuniarnikkut ajornartorsiortut pingasuugaangata ataaseq nakuuserfigineqartartoq

Danmarkimi kalaallit inuuniarnermikkut ajornartorsiuteqartut amerlasuut nakuuserfigitissimasartut, nalunaarusiap nutaap takutippaa. Ilungersunartorujussuuvoq, inuuniarnikkut ajornartorsiuteqartut pillugit siunnersuisoqatigiit oqarput.
Kalaallit Danmarkimi inuuniarnikkut ajornartorsiuteqartut 31 procentii nakuuserfigineqarnikuusimapput. Allat inuuniarnikkut ajornartorsiuteqartut nakuuserfiusimasarnerat 16 procentiinnaavoq.
Allattoq Anton Gundersen Lihn
oktobarip 08-at 2019 08:28
Nutserisoq Jaaku Lyberth, Connie Fontain

Kalaallit Danmarkimi inuuniarnikkut ajornartorsiuteqartut danmarkimi inuuniarnikkut ajornartorsiortunut sanilliullugit nakuuserfigineqarnerusarput qunusaarneqartarlutillu.

Nalunaarusiami nutaami saqqummiunneqaqqammersumi tamanna atuarneqarsinnaavoq, nalunaarusiami misissorneqarput, kalaallit Danmarkimi inuuniarnikkut ajornartorsiuteqartut Danmarkimilu inuuniarnikkut ajornartorsiuteqartut assigiinngissusaat.

Kalaallit Danmarkimi inuuniarnikkut ajornartorsiortut pingasuugaangata ataaseq nakuuserfigineqartarpoq.

AAMMA ATUARUK Kalaallinut inooqataanikkut ajornartorsiortunut aningaasaliissutit attatiinnarneqartut

Danmarkimi inuuniarnikkut ajornartorsiuteqartunut sanilliullugit marloriaammik amerlanerullutik.

- Ilungersunartorujussuuvoq kalaallit inuuniarnermikkut ajornartorsiuteqartut nakuuserfigineqartarnerujussuat, Danmarkimi inuuniarnikkut ajornartorsiuteqartut pillugit siunnersuisoqatigiinni siulittaasoq Jann Sjursen oqarpoq, taassuma misissuineq suliassanngortipaa.

Kalaallit inuuniarnikkut ajornartorsiuteqartut nakuuserfigineqarsimasut amerlanertaat allanit inuuniarnikkut ajornartorsiuteqarnerusarput. Kalaallit inuuniarnikkut ajornartorsiuteqartut pingajorarterutaanit amerlanerusut siorasaartinnikuusimasarput, allallu eqimattaniittut sisamararterutaannaanniillutik.

AAMMA ATUARUK Nunarput Danmarkilu suleqatigiittariaqarput

Kalaallit inuuniarnikkut ajornartorsiuteqartut inuuniarnikkut ajornartorsiuteqartunit amerlasuutigut allanit allaanerusarput. Ilaatigut angerlarsimaffeqannginnermut, imigassamik ikiaroornartumillu atornerluisuunermut, peqqinnermut aamma ikinngutinut ilaquttanullu attaveqarnermut atatillugu allaanerusarlutik.

- Taamaammat innuttaasunut inuuniarnikkut ajornartorsiuteqartunut allanut sanilliullugit allanik neqerooruteqarfiunissaat suliaqarfiusarnissaannut allaanerusariaqannginnersoq isumaliutigissallugu immaqa pissutissaqarpoq, Jan Sjursen oqarpoq.

Kalaallit Danmarkimi inuuniarnikkut ajornartorsiuteqartut pillugit misissuisitsinermit nalunaarusiaq aqaqu saqqummiunneqassaaq.

Nalunaarusiaq Syddansk Universitetip ataani Statens Instituttimik nalunaarusiarineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk