Hammondip Chemnitzillu aningaasanut inatsisissamut kissaatitik saqqummiukkaat
Folketingimut ilaasortat Aaja Chemnitz Larsen (IA) Aleqa Hammondilu (NQ) ”isumaqatigiinniarnissamut aallarniutaasumik ataatsimiinnissamut” aningaasaqarnermut ministerimit, Kristian Jensenimit (V) tallimanngornermi immikkut qaaqquneqarput.
Politikerit namminneq pingaartitaminnik saqqummiussinissaminnut danskillu naalakkersuisuisa aappaagumut aningaasanut inatsisissatut siunnersuutaata oqaaseqarfiginissaanut periarfissinneqarput.
AAMMA ATUARUK Danskit aningaasanut inatsisaat nunatsinnut aningaasartaqartoq
Nunatsinnilu eqqartuussiveqarnerup nukittorsaavigineqarnissaa Folketingimut ilaasortat Inuit Ataqatigiinnersup Nunattalu Qitornaaneersup tamarmik pingaartitaraat. Aleqa Hammond naapertorlugu danskit kalaallillu politiivini pineqaatissinneqarsimasunullu inissiisarfinni sulisut akissarsiaasa assigiinngissutaat naligiissinneqartariaqarput.
- Kalaallinik politeeqarlutalu pinerluuteqarsimasunik nakkutilliisoqarpugut, naak assigiimmik suliaqartoqaraluartoq, ilinniagaqartoqaraluartoq ataatsimillu sulisitsisoqaraluartoq, suleqatimisut danskisut akissarsiaqanngillat. Ajornartorsiuterujussuartut piaarnerpaamik aaqqitassatut tamanna isigaara.
Kinguaassiutitigut kannguttaatsuliortoqarsimanerata kingorna politiit meeqqanik killisiuisarnerisa ullumikkumit pilertornerusumik pisariaqarnera Aaja Chemnitz Larsenip erseqqissaatigaa.
Aamma nunatsinni illersuisunik akuerisanik ilinniartitsinissamut aningaasanik amerlanerusunik pisariaqartitsisoqarnera politikerit tamarmik erseqqissaatigaat.
Nunarput pillugu ilisimasat annertusarnissaat tamarmik taperseraat
Danskit naalakkersuisuisa Danmarkimi nunarput pillugu ilisimasat annertusarnissaannut 2019-imit 2022-mut 25 millionit koruuninik aningaasaliinissamik siunnersuutaat politikerit marluusut taperserpaat.
Aaja Chemnitz Larsen naapertorlugu kalaallinut Danmarkimi ilinniagaqartunut ilaqutarsiat kattuffiannik nutaamik pilersitsisoqarneratigut Danmarkimilu nunarput pillugu ukiumoortumik kulturisiorluni sapaatit akunneqartitsisoqartalerneratigut tamanna pisinnaavoq. Aammattaaq kalaallit suliffinnik aallarnisaasut illuannik nutaamik Danmarkimi pilersitsisoqarnissaa kissaatigaa.
AAMMA ATUARUK Der mangler midler til retsvæsenet i dansk finanslov
Nunatta Qitornaaneersup Aleqa Hammondip Danmarkimi innuttaasut kalaallit akornanni suliffissaaleqinerujussuaq, danskit naalakkersuisunit iliuuseqarfigineqartariaqarsorisani, aningaasaqarnermut ministerimut ilisimatitsissutigaa.
Folketingimut ilaasortat atlantikup avannaaneersut aningaasanut inatsisissatut siunnersuutip, ukiup naannginnerani aalajangiiffigineqartussap, isumaqatigiinniutigineqarnera peqataaffiginngilaat.
