Aleqa Hammond Eqqartuussiveqarnermut aningaasaliinerit amerlanerusut ujartorneqarput
Nunatta Qitornai sinnerlugit folketingemut ilaasortaq isumaqarpoq, eqqartuussiveqarnermut tunngasunik danskit naalakkersuisui amerlanerusunik aningaasaliisimasariaqaraluartut
- Kalaallit Nunaanni eqqartuussiveqarfinni atukkat, danskit eqqartuussiveqarfiini atukkatut pitsaatigissasut danskit naalakkersuisuisa angunigaraat, tamanna anguniarlugu, aningaasaliissutigineqartut takugaanni piviusorsiunngillat, Aleqa Hammond taama oqarpoq.
AAMMA ATUARUK Aningaasanut inatsisissatut siunnersuutaat Aajap iluarisimaaraa
Kalaallit Nunaani nunaqarfiit 60-iusut taakkunannga 14-it kommunefogedenik amigaateqarput taakkualu aaqqiivigineqarnissaannik danskit naalakkersuisut neriorsuisimagaluarput, aningaasanulli inatsimmi tamanna takuneqarsinnaasimanani.
- Inuiaqatigiinni innuttaasut inatsisitigut illersugaanerisa sakkortusarneqarnissaat, danskit naalakkersuisuisa suleqatigiinnissaminnik isumaqatigiissutigisimagaluaraat, tamassuma timitalerneqarnissaannut erseqqittoqanngilaq, Aleqa Hammond Nunatta Qitornai sinnerlugit Folketingemut ilaasortaq taama oqarpoq.
Illersuisut taamatullu Nuummi parnaarussivissami atorfinittussat pikkorissartinneqarnissaannut aningaasanut inatsimmi immikkoortitsisoqarsimannginnera Aleqa Hammondip ujartorpai.
Danskit Naalakkersuisuisa 2019-mut aningaasanut inatsimmi siunnersuuteqarnerminni, Naalagaaffeqatigiinni nunat ilisimaneqarnerulernissaannik 15 million kr-nik immikkoortitsipput.
