Aningaasanut inatsisissatut siunnersuutaat Aajap iluarisimaaraa
Inuit Ataqatigiit sinnerlugit Folketingimi ilaasortaq Aaja Chemnitz Larsen taama isumaqarpoq, siunnersuummut ilaatinneqartut marluk nuannaarutiginerarpai.
- Inatsisitigut ataataqanngitsunut tunngatillugu suliniuteqarnerup nukittorsarnissaanut ikiorneqarnissaminnillu nalornissuteqartut paasititsiniaaviginissaannut aningaasanik immikkoortitsisoqarpoq. Tamanna pitsaasutut isigaara. Aappaattullu, kultureqarnermut 15 millionit koruunit immikkoortinneqarput, taakkulu naalagaaffeqatigiinnerup Danmarkimi ilisimasaqarfinerulernissaanik suliniuteqarnermut atorneqassapput. Tamannalu isumaqarpunga pitsaalluinnartuusoq.
Aaja Chemnitz Larsenili isumaqarpoq inatsisinik atuutsitsinermut suliassaqarfimmut annertunerusumik aningaasaliisoqarnissaa amigaataasoq, ilaatigut alaallit Nunaanni illersuisuuneqarfimmut. Aamma nunatsinni politiit suliniutinut pitsaasunut amigaateqartut erseqqissaatigaa.
AAMMA ATUARUK Danskit aningaasanut inatsisaat nunatsinnut aningaasartaqartoq
- Meeqqanik kinguaassiutitigut kannguttaatsuliortoqarneranik nalunaarutiginninnerit pillugit politiit sukkanerusumik iliuuseqarnissaat kissaatigigutsigu, taava tamatumunnga aningaasat malinnaatinneqarnissaat aamma pingaaruteqarpoq.
Nunatsinni inatsisinik atuutsitsinermut suliassaqarfimmut amerlanerusunik aningaasaliissuteqartoqarnissaanik naalagaaffeqatigiinnerullu Danmarkimi ilisimasaqarfigineqarnerulernissaanik kissaateqarnerup saniatigut, Nunatta, Danmarkip EU-llu akornanni inuussutissarsiornerup iluani aporfiusartut arlallit peerneqarnissaat Inuit Ataqatigiit Folketingimi sulissutiginiarpaat.
2019-imut aningaasanut inatsisissatut siunnersuut Folketingimi sapaatit akunnerata tulliani sisamanngornermi siullermeerneqassaaq. Tamatumalu kingorna danskit aningaasaqarnermut ministeriata Kristian Jensenip Folketingimilu partiit isumaqatigiinniarnerit aallartissavaat.
