Gukki Nuka Nuummi saqqummersitsilersoq
Eqqumiitsuliortup kalaallip Danmarkimi najugaqartup Gukki Nukap, mobili atorlugu imminut assiliorluni meeraarnermini inuusuttuaraanerminilu kinguaassiutitigut atornerlugaasimanermi kingunerlutsitsinera takutinniarpaa.
Eqqumiitsuliortup timini eqqumiitsuliamini sammivaa, taakkunanilu timaa pigisanngorpoq, pilliutitut, ilusilersukkatut inuttullu. Ilaatigut sinnattutut; nunatut sermilittut imaluunniit orpippassuartalittut isikkoqarlutik.
Gukki Nukap inuit qanoq qisuariaateqassanersut ernumagalugu eqqumiitsuliortarnermigut inuiaqatigiinni pissutsit pillugit siornatigut isummersortarsimanngilaq.
Aamma atuaruk Kalaallit eqqumiitsuliaat nuannarineqaqisut
Tamannali maanna allanngortippaa, Nuummi Eqqumiitsulianik Saqqummersitsiviup tusagassiorfinnut nalunaarutaani taama oqarpoq.
- Ukiuni kingullerni kamanneq allanillu ikiuerusunneq annertusiartorsimavoq, neriuutaarunneq ilioriusissaaleqinerlu pigiinnarsinnaajunnaarnissaata tungaanut, Gukki Nuka taama oqarpoq.
Saqqummersitsineq borgmester Asii Chemnitz Narupimit sisamanngorpat ualikkut ammarneqassaaq novembarillu arferngata tungaanut ingerlanneqassalluni. Saqqummersitsineq kingorna Nordatlantens Bryggemi upernaaru saqqummersinneqartussaassaaq.
Saqqummersitsinermut atortussat atuartunut angajullernut ilinniarnertuunngornianullu atuartitsissutissat ilanngunneqassapput. Atuartitsinermut atortut saqqummersitallu ikinnerusut ilaatigut Ilulissanut, Paamiunut, Nanortalimmut Narsamullu angallanneqassapput.
