Greenland Travel Qaqortumi allaffimmik ammaasoq
Greenland Travel Qaqortumi allaffimmi nutaami pingasunngornermi ammaanersiorpoq.
Angalatitsivik tusagassiuutinut nalunaarummi allappoq.
- Angalaqqinnissara ilaquttannullu maaniittunut qaninneruleqqinnissara ukiorpassuarni kissaatigaara, angalatitsiviup kujataani immikkoortortaqarfiani siuttuulersoq, Tina Lauritsen oqarpoq, nangillunilu:
- Ukiuni tulliuttuni ineriartortitseqataanissaq pissanganarluinnarlunilu pissarsiaqarfiulluassaaq.
Greenland Travelip atuisartumi ilarujussuisa nunatta kujataaninngaanneersuunerat pissutigalugu kujataaniilernissaminnut periarfissat piffissami sivitsortumi misissorpai.
- Attaveqaasersuutit nutaat aamma angallannermi unnuinermilu suliaqartoqarnerulerneratigut neqerooruteqarniarneq aamma ajornakusoornerulerpoq, Greenland Travelip pisortaa, Mikkel Søndergård oqarpoq.
Angalatitsiviup oqarnera naapertorlugu allaffimmik nutaamik pilersitsinerup kingunerisaanik atuisartut pingaarnerit qaninnerulerneqarlutillu nunap immikkoortuani inuussutissarsiornermi ineriartorneq taperserneqassaaq.
Qaqortumi allaffik nutaaq angalatitsiviup allaffiliarisaasa sisamassaaraat. Qaqortumi allaffiup nutaap saniatigut Nuummi, Ilulissani Sisimiunilu aamma allaffeqarfeqarpoq. Uanilu sulisut katillugit 52-iupput, tassunga Københavnimi allaffimmiittut ilanngullugit, Greenland Travel oqarpoq.
Angalatitsiviuttaaq nunatta kujataani takornariaqarnermi ineriartortitsineq taperseeqataaffigerusullugu oqaatigaa.
