Nunarput nunat takornariarfissaqqinngitsut allattorsimaffianni ilaatinneqartoq
Kalaallit Nunaata nunat takornariarfissaqqinngitsutut nunat tamalaat allattorsimaffiannut, tassa “Not Hot List”-imut ilaatinneqarnera immaqa ajuusaarutigineqarsinnaavoq. Allattorsimaffimmulli tassunga, Australiami angalatitseqatigiiffiit ilaannit Intrepid Travelimit ukiut tamaasa saqqummiunneqartartumut ilaatinneqarnissamut tunngavigineqartut qimerlualaaraanni nuannaajallannissamut tunngavissaqarpoq.
Nunat takornariarfissaqqinngitsutut nunat tamalaat allattorsimaffiannut ilaatinneqarnissaannut ilaatigut tunngavigineqartut tassaapput, nuna aserorsimanngitsoq, piujuaannartitsineq aallaavigalugu suliniutilik, avinngarusimasoq sumiiffinnilu ataasiakkaani periarfissagissaartoq. Tassa nunat allat ima takornariarfiutigiput allaat takornariaqarpallaalersartarlutik, nunarpulli tassunga suli killeqqajanngilaq.
- Kalaallit Nunaat ornitassaqqissut akornanni qaangiinnarneqartunut aatsaat ilaalinngilaq. Taamaannerali nunat tamalaat Issittumik soqutiginnileraluttuinnarnerannut takussutissaavoq, takornariartitsinermik ilisimatusartoq Aalborg Universitetimi AAU Arcticimik aamma aqutsisuusoq Carina Ren oqarpoq.
Takornariartitsiffiorpiartanngitsut tikikkumaneqarneruleriartortut
Nunat takornariartitsiffiorpiartanngitsut maanna ikittunnguupput, nunarsuarmilu tamarmi takornariaqarneruleraluttuinnarluni. Taamaanneralu allattorsimaffimmi Intrepid Travelip “Not Hot List 2025”-mik taallugu saqqummerseqqammisaani erseqqilluinnartoq, Carina Dam isumaqarpoq:
- Angalasoqarnerulernerata avinngarusimanerusunullu angalasoqarnerulernerata ilutigisaanik takornariartitsiffiorpiartanngitsut tikikkumaneqarneruleriartorput, Carina Ren oqarpoq.
Kalaallit Nunaat pillugu paasissutissanik ujaasisoqaraangat tamanna aamma erserneruleraluttuinnartoq, Visit Greenlandip pisortaanera Anne Nivíka Grødem oqarpoq.
- Paasissutissanik nittartakkatsinni ujaasisut Kalaallit Nunaanni najugaqartoqarnersoq ilumullu Kalaallit Nunaannukartoqarsinnaanersoq ilaatigut misissortarpaat. Allattorsimaffik taanna aqqutigalugu ersarinnerulerlutalu akuersaarneqarnerulertarpugut, taanna oqarpoq.
Kalaallit Nunaannut takornariartoqarnerulernerata nunatsinnut iluaqutaanerunissaa, Visit Greenlandip pisortaanerata kissaatigaa.
- Takornariartitsisarneq nunatsinnut qanoq ililluni iluaqutaanerullunilu ineriartortitsisinnaanerunersoq paaserusupparput - tassa aningaasarsiornikkut sumiiffinnili ataasiakkaani najugalinnut aamma qanoq iluaqutaanerusinnaanersoq paaserusullutigu, taanna oqarpoq.
Assersuutigalugu erinarsortartup ilisimaneqarluartup Justin Bieberip nipilersuusiaminut atatillugu videoliorami Islandimi ilaatigut immiussinerata kingorna Islandimut takornariat amerlipput. Nunaniilli tamalaanit maluginiarneqarneq mianerisassaasoq, takoriartitsinermik ilisimatusartoq AAU Arcticmeersuusoq Carina Ren oqarpoq.
- Akisussaassulimmik takornariartitsisarnissaq tamatta anguniartariaqarparput. Tassa takornariat akornutaanatik iluaqutaanerusinnaanissaat ujartortariaqarparput, takornarialerisunut takornarianullumi aamma, taanna oqarpoq.
Nunaqavissut takornarianit akornusersorneqartutut misigissanngitsut
Nunatta nunat tamalaat allattorsimaffiannut ilaatinneqarnera akerlianik periarfissiisoq tamannalu nunatsinni takornariartitsiffiusartut amerlinissaannut iluaqutaasinnaassasoq, Visit Greenlandimeersoq Anne Nivíka Grødem isumaqarpoq.
- Allattorsimaffimmut taassumunnga ilaatinneqarneq takornariarfiusinnaasutut ilisimaneqarpianngitsut ornigarneqarnerulernerannik kinguneqarsinnaavoq. Ilulissammi aasakkut takornariaqartaqisoq nalunngilarput, taamaattarneralu illoqarfiit ungasinngisaanniittullu takornariaqarnerulernissaannut qanoq atorluarsinnaavarput?, taanna oqarpoq.
Nunatsinnimi takornariartitsineq ataatsimut isigalugu ingerlalluartoq, Visit Greenlandip qanittukkut misissuinerani paasinarsivoq.
- Sumiiffiit ilarpassuini suleqatigiilluartoqartarpoq, sumiiffinnili ataasiakkaani equngasoqarluni. Taamaammat tamatumunnga tunngatillugu pitsanngorsaaniartoqarpoq, Anne Nivíka Grødem oqarpoq ilanngullugulu oqaatigalugu nunaqavissut takornarianit akornusersorneqartutut misiginnginnissaat pingaartuusoq.
Takornariartitsinermik ineriartortitsinermut aaqqiissuteqarfissaqqittut pingasuusut
Nunatsinni takornariartitsinermik ineriartortitsinermut aaqqiissuteqarfissaqqittut pingasuusut, AAU Arcticimeersoq Carina Ren oqarpoq. Tassa umiarsuarnik takornariartaassuarnik tikittoqartarnerata, mittarfissualiortoqarnerata akunnittarfiliortoqarnerata malitsigisaanik takornariarpassuaqarneq. Akissarissaartunik assissaqanngitsumik misigisassarsiortunik takornarniartitsineq. Taavalu inoqarfinni soorlu umiatsiamik angallassinertalimmik, aalisariarnertalimmik kaffillernertalimmillu takornarniartitsineq.
Kingullertullu taasaq Visit Greenlandip piumaneqarnerussangatippaa:
- Sullitatta inoqarfiit minnerit nunaqavissunik qanimut naapitaqarnissamut periarfissaqarluarfiunerummata avinngarusimanerummatalu tikikkusunnerukkajuppaat. Takornarniat nunatsinni pinngortitamik eriaginninnermik akisussaassuseqarlutik inuinillu ataqqinnillutik assissaqanngitsumik misigisassarsiorusuttut ukkataraavut, Anne Nivíka Grødem oqarpoq.
