Greenland Energymut aningaasaliisut Trumpip oqaaseqarnera iliuuseqarneraluunniit pissutigalugu akit qaffannissaat neriuutigigaat

Greenland Energymi aningaasaliisut Donald Trumpip nunatsinnut soqutiginninnera Amerikamiut uuliaatileqatigiiffiannik qaffaasussatut isigaat.

Tamanut ammasumi Telegram-gruppimi 200-ngajannik ilaasortaqartumi Donald Trumpip immikkullu aallartitaata Jeff Landryp aammalu tv-kkut aallakaatitsisartup Dr. Philip Tunumi Jameson Landip eqqaani uuliasiornermut qanoq iluaqutaatigissaneri aktiaatillit eqqartorpaat.

Allanut ammanngitsumik allaqatigiinnermi siulersuisut siulittaasuata Larry G. Swets, Jr.-ip Trumpimik tapersersuisut ‘ineriartornermut qanimut malinnaaffiginninnerannik’ oqaaseqarnerata assilinera gruppimi ilaatigut saqqummiunneqarpoq.  

Allaqatigiinnermi tassani siulersuisuni siulittaasup ilaasortallu allap Amerikami aqutsisoqarfiup suliffeqarfimmik piginneqataasinnaannginnera eqqarsaatigaat.  

Allaqatigiiffimmi ilaasortat ‘Trump pump’-imik taaneqartartup pinissaa - tassa USA-p præsidentiata ingerlatseqatigiiffiup uuliasiornermilluunniit suliniut aqqinik taangajaleraa - ullut tamangajaasa oqaluuserisarpaat.

Amerlanerpaat taama pisoqarsinnaasoraat.

Tamanna aktianut qaffatsissasorigamikku qilanaarput. 

Pissaanilinnut attaveqaateqarneq

Ingerlatseqatigiiffiup aqutsisui marluk, ilaatigut Larry G. Swets, Jr. allaqatigiittarfimmik inuit attaveqaqatigiittarfiatigut X-ikkut akuerinneqqammersoq oqaloqatigiittarfimmi ilaasortaapput.

Taassuma ingerlatseqatigiiffimmut tunngasut pillugit siunnersorneqarumalluni ilaasortat ilaatigut apersortarsimavai ingerlatseqatigiiffiullu tapersersorneqarnissaanut inoqatinut attaveqaqatigiittarfikkut kajumissaartarlugit. 

Atuisup ‘Pete Mills’-ip paasinnittaatsini malillugu Larry Swets Trumpimik tapersersuisunit ersarissumik tapersersorneqarnera takusinnaallugu qaammatip aallartinnerani allaaseraa. 

- Isumaga naapertorlugu, Dr. Phil-imut tamarmi aaqqissuunneqassaaq, ‘Pete Mills’ naggasiivoq.

Greenland Energyp aqutsisuisa Trumpip immikkut aallartitaa Jeff Landry maajimi ataatsimeersuarnerup Future Greenlandip nalaani naapippaat, Landryllu tamatuma kingunitsianngua Fox Newsimi apersorneqarnermini uuliasiornissamik suliniut, eqimattami aningaasaliisut Greenland Energymut atassusigaat oqaluuseraa.

- Larryp Greenland Energyllu Jeff Landry nalunngilluarpaat. Dr. Phil Trumpilu ikinngutigiipput. Jeff Greenland Energy pillugu Fox Newsimut toqqaannanngitsumik oqaluttuarpoq. Dr. Phil Kalaallit Nunaannukassaaq, atuisoq alla ‘Robbie’ qanittukkut allappoq. 

- Eqqarsarluaritsi Trump pump takkutingajalerpoq ‘Robbie’ ilaliivoq ilaasortaniillu allaniit pissangarpaluttunik qisuariarfigineqarluni. 

Trumpip tapersersuisui GLND-lu

Suliffeqarfiup aqutsisuisa, siulersuisuisa aamma Trumpip aqutsisoqarfiata attaveqatigiilluarnerat ingerlatseqatigiiffimmut iluaqutaasinnaanera allatani ilaatigut ersarippoq.

- Uuliaqarlunilu aningaasaqaraangat aamma attaveqatigiittoqartarpoq, ilaasortat ilaannit politikkikkut attaveqaatit oqaluuserineqarmata, allaqatigiittarfiup aqutsisua ‘ Chilli’ oqarpoq.

- Suliffeqarfimmi ikinnguteqartoqarluarpoq, New Yorkimit aningaasaliisartoq, 37-nik ukiulik suliniummut 30.000 dollarsinik (aktianik 12.000-inik) aningaasaliisimasoq, KNR-imut oqarpoq.

Inuup Greenland Energymut qanittup Trumpip allattoqarfianut arlaatigut atassuteqartoqarnera imaluunniit Amerikamiut naalakkersuisuinit tapersersorneqarnissamik naatsorsuuteqarnissartik itigartitsissutigaa.

- Kalaallit inuit ukkatarerusuppaat - ukkataraallu, pineqartoq oqarpoq.

Ingerlatseqatigiiffiup Turmpimit tapersersuinermik pisortatigoortumik nalunaaruteqartoqarnissaa naatsorsuutiginngikkaa aamma atorfilittaanit tusagaqaqqissimannginnertik tupaallaatigilaaraa taassuma oqaatigaa.

Tusarfiup oqarnera naapertorlugu gruppimi oqaloqatigiinneq pingaaruteqartutut isigineqartariaqanngilaq.

Gruppimi ilaasortat 'Tuluit Nunaannit daytraderitut' ingasaassisumik paasisaqartutut nunarsuarmilu piviusuunngitsunik atassusiisutut oqaatigineqarput.

- 10.000-it sinnerlugit aktiaateqartoqarnissaa qularutiginngilara. Inuit aktiat qaffannissaat neriuutigaat, taakkulu eqqarsarluaqqaaratilluunniit aningaasaliisarput, paasissutissiisoq KNR-imut oqarpoq.

Aktiaatillit ilaasa, KNR-ip oqaloqatigisimasaasa, Trumpimik tapersersuisunit maluginiarneqarneq toqqaannarlu tapersersorneqarneq ingerlatseqatigiiffimmut iluaqutaanerunani ajoqutaaneruinnarnissaanik isumaqarfigaat.

- Trumpip Greenland Energyp uuliamik nassaarnissaanut ikiorunanngilaa, Tuluit Nunaannit sivisuumik aningaasaliisinnaanissamik periarfissalik KNR-imut taama oqarpoq.

- Uuliaqarneranik misissuinissap qillerinissallu aallartinnissaat pingaarnerpaavoq. Najugaqartullu peqataatinneqarnissaat suliniummullu tapersersuinissaasa qulakkeerneqarnissaat, ilaasortaq oqarpoq.

Tamanut nittarsaassinermik tunngaveqartoq

TV-kkut aallakaatitsisartoq, Dr. Phil suliniummut pingaarutilittut aamma nassuiaatigineqarpoq.

Dr. Philip ingerlatseqatigiiffiup tamanut nittarsaanneqarnissaa anguniarlugu nammineerluni qilleriffimmukarluni isiginnaagassiamik nangeqattaartuliorniarpoq.

Tv-kkut aallakaatitsisartup præsidentimik ikinnguteqarnera Amerikamiunut uuliasiortartunut  pingaaruteqartutut erseqqissarneqarpoq.

Gruppimi oqallinnermi taassuma nittarsaassinera, Trumpimik alapernaatsitseqataasinnaanera ilaatigut pissutigalugu pinngitsoorneqarsinnaanngitsutut oqaatigalugu nersualaarutigineqarpoq.

- Trumpip Kalaallit Nunaannut sioorasaaruteqarnerata kingunerisinnaasai eqqarsaatiginagit atorluarniarsaraat, ilaasortaq, New Yorkimeersoq, Kevin KNR-imit oqarasuaatikkut oqaloqatigineqarami oqarpoq.

Paasissutissiisup Greenland Energymi aqutsisunut qanittup Dr. Philip Trumpimut attuumassuteqarnera 'uggornartumik allamut saatsitsisoq’, nassuerutigaa, kisianni tv-kkut aallakaatitsisartup peqataanera 'trojansk hestitut' (ersinngitsumik anguniagaqarnertut) paasineqassanngitsoq – 'Kalaallit Nunaalli pillugu oqaluttuarusuinnartoq', sulisup KNR-imut oqaatigaa.

'Aningaasat malillugit'

Gruppimi ilaasortat oqallinnermi ingerlaavartumi allami malunnaateqartumi aningaasaliisartup iluatsilluarsimasup, Trumpimullu aningaasaliisup Ken Griffinsip suliniutip ilippanaateqarneranut aningaasaliinera qanoq isumaqarfiginerlugu oqaaseqarfigaat.

- Taanna aningaasaleerujussuartarpoq. Amerlanerpaanik aningaasaliisarlutik. Arlaannit oqaluttuunneqarsimanngikkuni suliniummut taama angitigisumut aningaasaliineq ajorpoq. Kalaallit Nunaanni uuliaqangaatsiarpoq. Oqartoqartarneratullu: Aningaasat malillugit, gruppimik ingerlatsisoq, 'Chilli.' allappoq.

Ken Griffinip aningaasaliiffissatsialak alla nassaaraa?

Gruppip ilaasortai nunarsuarmi tamalaaneersut aktiemik allanit suli malugineqanngitsumik nassaarsimallutik upperilluinnarpaat.

Telegram-gruppi aktiamut 100-eriaammik qaffattartumut innersuussillutik '#GLND 100 Bagger'-imik taaguuserpaat.

Greenland Energyp pisortaata Robert Pricep  Telegram-gruppi, namminneq aningaasaliisartuniit ingerlanneqarnerarpaa aammalu aqutsisut peqataanerannut pisortatigoortumik akuersissuteqartariaqannginnerarlugu, taannalu ingerlatseqatigiiffimmit pilersinneqannginnera ingerlanneqannginneralu allakkatigut akinermini oqaatigaa.

Taassuma Trumpip atorfilittaanut ingerlatseqatigiiffik attaveqannginnerarpaa suliniutillu siunissami ingerlanneqarnissaanut kalaallit oqartussaasuisa akuersissutaat, nunap qanoq innera niuernikkullu ingerlatiinnarneqarnissaanut taamaallaat apeqqutaaneri erseqqissaassutigalugu.

Dr.Philip piviusulersaarummi inissisimanera politikkikkut attaveqaataanut attuumassuteqanngitsutut taagorneqarpoq suliniutillu ‘Trumpip suliniutaatut’ isigineqassannginneranik ingerlatseqatigiiffimmit oqaatigineqarpoq.