Dr. Phil Kalaallit Nunaanni uuliasiorneq pillugu piviusulersaarummi nutaami aallakaatitsisuussasoq

Amerikamiu tusaamasaq Dr. Phil Tunumi uuliasiorneq pillugu piviusulersaarusiami aallakaatitsisuujartorluni nunatsinnut juulimi tikeraassaaq.

USA-mi tusagassiorfik NewsNation taama allappoq.

Piviusulersaarummi ‘Arctic Wildcatters’-imi Amerikamiut uuliasioqatigiiffiata Greenland Energyp Jamesonlandimi uuliasiornera immikkoortuni arfinilinni takutinneqassaaq.

Tamanna Dr. Philip suliffeqarfiutaa Envoy Media suleqatigalugu pissasoq Greenland Energyp tusagassiuutinut nalunaarutaani allassimavoq.

Dr. Phil - Phil McGrawimik ateqartoq - suliniut pillugu NewsNationimit apersorneqarami nuannaarluni oqaluttuarpoq.

- Ilimagisaattut pisoqassappat, isumaqarpungalu piviusorsiorpalaartut, taava Kalaallit Nunaat inuillu tassani najugaqartut inuunerat qaqugorsuarmut allanngortinneqassaaq, taanna oqarpoq.

'Iluanaarujussuarneq'

Greenland Energyp uuliamik nappartanik 13 milliardinik nassaarnissani naatsorsuutigalugu siusinnerusukkut nalunaarutigaa.

Geus Grønlandip oqarnera naapertorlugu uuliamik taama annertutigisumik nassaartoqarnissaa ilimananngilluinnarpoq. Taakkua uulia nappartat 350 millioniunissaat ilimanarnerunerarpaat. Kisitsit taanna qulakkeerqqaneqanngilaq.

Uuliasioqatigiiffiup ilimagisamisut uuliamik nassaassappat, Phil McGrawip oqarnera naapertorlugu tamanna aamma nunarsuarmut sunniuteqangaassaaq.

- Tamanna inunnut taakkununnga aamma soorunami Kalaallit Nunaannut iluaqutaangaassaaq. Uulialli annerpaartaa Europamut nassiunneqassaaq, tamannalu pissutigalugu inuit, assersuutigalugu Kangerliumanersuup nerukinnerak Hormuzimik aqutsisut, sunniuteqarpallaarunnaarumaarput. Tamanna Europami niueqatigiiffiannut Amerikamiullu niueqatigiiffiannut oqilisaataassaaq, taanna NewsNationimut oqarpoq. 

Ittoqqortoormiini innuttaasunut ataatsimiititsineq

Phil McGrawip piviusulersaarusiornissaq Greenland Energyp pisortaanera siulersuisuinilu siulittaasuat ataatsimeeqatigereeramigit aallartissimasoq, NewsNationiumut nassuiaatigaa.

Greenland Energyp pisortaa Amerikamiu Robert Price, ujarassiooq ingerlatsinermullu pisortaq Olga Solovieva peqatigalugu Ittoqqortoormiini innuttaasunik sapaatip-akunnerani kingullermi ataatsimiititsivoq.

Innuttaasut arlallit isumakuluutitik ataatsimiinnermi oqaatigaat.

Naalakkersuisut namminneq Ittoqqortoormiini uuliasiornissaq pillugu innuttaasunik ataatsimiititsinissamik suliniuteqartut, Nunanut allanut, inuussutissarsiornermut aatsitassanullu naalakkersuisoq Múte B. Egede (IA) KNR-imut oqarpoq.

Aamma Greenland Energyp nalunaarutaasa ilaat isumaqataaffiginngilai.

- Ingerlatseqatigiiffiup innuttaasunut oqaasii, pissutsinut piviusunut tamatigut naapertuuttuarneq ajorput, Múte B. Egede oqarpoq.

Greenland Energyp tusagassiuutinut nalunaarutaa naapertorlugu, nangeqattaartuliaq nutaaq 2026-mi ukiassarnerani takutinneqaqqaarneqarnissaa naatsorsuutigineqarpoq.

Dr. Phil Amerikami tv-kkut aallakaatitassiamit nuannarineqarluartumit taama taaguutilimmit ilisimaneqarpoq. 'Dr. Phil' 2002-mi takutinneqaqqaarpoq ukiunilu 21-ni aallakaatinneqarluni.

Taassuma præsident Donald Trumpimik tapersersuisuunera inunnit ilisimaneqarpoq.