Great Greenland amigartooruteqartoq
Suliffeqarfik Great Greenland, Namminersorlutik Oqartussanit pigineqartoq 1,8 millionit koruuninik 2017-imi amigartooruteqarpoq. Tamanna 2016-imi 633.000 koruuninik sinneqartooruteqarnermit kinguariarneruvoq.
Suliffeqarfik naapertorlugu Glostrupimi immikkoortortaqarfimmini tillinniartoqarnera amigartooruteqarnermut ilaatigut pissutaavoq:
- Tillinniarnerit ilaanni 2017-imi saqqummersitat tamarmik tillinneqarput taamaammat Glostrupimi tillinniarfigitinnerit pinaveersaarnerujumallugit sillimmasiinerit aningaasanik atuiffiusariaqarsimapput, suliffeqarfik allappoq.
AAMMA ATUARUK GG aamma KNAPK Nuummi tunitsiveqalerusupput
Namminersorlutik Oqartussat suliffeqarfimmut tapiissutai 3,6 millionit koruuninut aamma apparneqarsimavoq, tamatumalu saniatigut Great Greenlandip oqaluttuarisaanera puisit amiinik aatsaat taama tunisisukitsigivoq, tamannalu suliffeqarfiup ingerlanneqarneranut amernillu tunisiniarnermut sunniuteqarnerluppoq.
Ammit tunisat 25.000-ingajaapput tamannalu Great Greenlandimut uggornarpoq ammimmi akii 2017-imi qaffakkiarsimapput.
Suliffeqarfiulli naatsorsuutaani arlalinnik ajunngitsortaqarpoq, nioqqutissammi naammasseriikkat tunineqartarnerat, 800.000 koruunit misaannik qaffassimasoq pisisartullu naammagisimaarinninnerulersimasut suliffeqarfiup nalunaarutigaa.
AAMMA ATUARUK Pisortanngortoq amernik amerlanerusunik pissarsiniassaaq
Suliffeqarfiup pisortarisimasaata, Ditte Sorknæsip atorfini 2017-imi decembarip qaammataani qimappaa. Ditte Sorknæsip ukiuni marlunni pisortaanermini Great Greenlandip aningaasaqarnera 2014-imi 2015-imilu amigartooruteqarfiusoq mumisippaa.
Juliane Henningsen Great Greenlandimi qanittumi siulersuisuni siulittaasussatut toqqarneqarpoq.