Kim Kielsen: Danmarkip akisussaafferujussuarmik tunivaatigut
Nunarput, USA Danmarkilu Pituffimmi kiffartuussinissamut isumaqatigiissut pillugu isumaqatigiissummik ippassaani atsiorput.
Danmarkimit malinnaaginnarput, nunanulli allanut tunngasunut ministeri, Jeppe Kofod, isumaqatigiissummut atsioqataanngilaq. Nunattalu, USA-p Danmarkillu akornanni suleqatigiinnermi Danmark isumaqatigiissummut aatsaat atsioqataanngilaq.
Pituffimmili kiffartuussinissamik isumaqatigiissuteqarfigineqartussamik aalajangiinermi tunngavimik sukaterineq kisiat isumaqatigiissutigineqanngilaq.
Tamannalu pingaartoq, Naalakkersuisut siulittaasuat, Kim Kielsen (S), isumaqarpoq.
- Avataaninngaanniit isigineqarneq soorunami allaassaaq. Amerikamiut kingullermik oqariartuutaat eqqaamaqaarput. Nunarput pisiarerusuppaat, uagullu oqarpugut: Tuniniagaanngilagut niueqatigiinnermut ammavugut, tassa massakkut tassuunartaatigut alloriarpugut, Kim Kielsen oqarpoq.
Pituffimmi kiffartuussinissamik isumaqatigiissutip suliariumannittussarsiuunneqarnissaanut isumaqatigiissuteqarput.
Kiffartuussinissamik isumaqatigiissut amerikamiut ingerlatseqatigiiffiannit maanna tigummineqarpoq, taannalu 2024-mi atorunnaassaaq. Pituffimmi kiffartuussinissamut isumaqatigiiffigineqartussat nunatsinniinnissaat aqutsisuisalu nunatsinni najugaqarnissaat maanna piumasaqaataalerpoq.
Kisianni nunatta USA-llu ilaatigut niueqatigiinnermut ilinniartitsinermullu suleqatigiinnissamut aamma pilersaarusiorput.
- Danmarkikkooqqaarnata amerikamut niueqatigiinneq suleqatigiinnerlu toqqaannartoq aqqutissiuupparput, toqqaannartumillu suleqatigiinnissatsinnut sinaakkutissat maannakkut suliarinissaanut periarfissaqalerpugut, nunanut allanut tunngasunut naalakkersuisoq Steen Lynge (D) oqarpoq.
AAMMA ATUARUK Sillimaniarnermik immikkut ittumik ilisimasalik: Amerikamiut soqutiginnimmata politikkikkut siunnersorti Nuuliarpoq
Nunat pissaanilissuit Issittumik soqutiginninnerujartorput, USA-lu nunatsinnit sivisuumik nuannarineqalerniarsarivoq.
Amerikamiut ilaatigut nunatsinni sinniisoqarfiliorput, nunatsinnut 83 millionit koruuninik aningaasaliillutik Pituffimmilu kiffartuussinissamik isumaqatigiissuteqarfigineqartussamik aalajangiinissamut tunngavinnut nunatta ingerlatseqatigiiffiinut pitsaanerusunut akuersipput.
AAMMA ATUARUK Ataatsimut isiginninneq: Kunngeqarfiup USA-llu nunarput pillugu isumaqatigiissutaat
Taavalu nunap pissaanilissuup nunarput suleqatigiinnissamut pilersaarusioqatigaa. Pilersaarusiarlu danskinit akuersaarneqartoq, Kim Kielsen oqarpoq.
- Siullermik qallunaat peqatigalugit aallartippugut, kisianni maannakkut periarfissinneqarpugut uagut nammineerluta amerikamiut qanimut tamakkua isumaqatigiissutit suliarisinnaassallugit. Taanna alloriarneruvoq annertooq, akisussaaffik annertooq qallunaat nunaanninngaanniit nunatsinnut tunniunneqarpoq, Kim Kielsen oqarpoq.