USA Issittoq pillugu qammarsaaniartoq
Pisariaqarpoq silap pissusiata allanngoriartornerata unitsitsinissaanik nunarsuup sinnera paasitissallugu. USA'p Issittumi siunnersuisoqatigiinni siulittaasuunerani atorfilittaasoq Danmarkimi ataatsimiittoqarnerani taama oqarpoq.
Nunarsuarmioqatigut Issittoq pillugu paasisaqarneruppata, naalakkersuisut arlaqarnerusut silap pissusiata allanngoriartornerata annikillilernissaa anguniarlugu suliniuteqalersinnaapput.
USA'p Issittumi siunnersuisoqatigiinni siulittaasuunerani atorfillit qullersaat Julia Gourley taama isumaqarpoq.
- Issittup nunarsuarmut tamarmut sunniuteqartarnera pillugu inuit paasisaqarnerugunik, nunarsuarmi klimamut sunniuteqarnera, nunarsuarmi imavissuarnut allanullu sunniutai pillugit paasisaqarnerugunik - taava innuttaasut naalakkersuisutik klima pillugu suliniuteqarnissamut annerusumik iliuuseqartissinnaavaat, aammalu nunap inoqqaavisa piginnaatitaaffii illersoqqullugit.
Aamma atuaruk Issittumi Siunnersuisooqatigiinni peqataaneq iluaqutissartaqartoq
Issittumi siunnersuisoqatigiinni USA apriili naalersoq siulittaasunngorpoq Canada taarserlugu. Naalagaaffiit Peqatigiinni, allanilu politikkikkut katersuuffinni assigiinngitsuni USA'p Issittoq ilisaritilerusuppaa, ingammillu qarasaasiatigut inuit attaveqatigiittarfii aqqutigalugit.
- Nutaarsiassaqartitsiviit sapinngisamik assigiinngitsut atorusuppagut, naqitat kisiisa pinnagit. Ingammillu inuit qarasaasiatigut attaveqatigiittarfii aqqutigalugit inuusuttut angorusullugit. Inuusuttut siunissaraavut - taakkulu Issittumut klimallu allanngoriartorneranut uisikkusuppagut.
Aamma atuaruk Amerikamiut pingaarnersiuinerat Naalagaaffeqatigiinnit nuannaarutigineqarpoq
Siulittaasuunermini USA'p siullertut issittup imartaani uumassusillit isumannaallisarusuppai, imaanilu angallannermi isumannaallisaaneq - Issittormiullu inuuniarnerminni atugaat pitsanngorsaavigalugit.
Piujuartitsinissaq siunertaralugu Issittumi aningaasalersuisoqassaaq - eqqakkat aqqutaat sullullit aammalu imeqarniarneq issittormiunut pitsanngorsaavigineqassapput.
Tamanna pissaaq nunap inoqqaavisa kissaataat qalliuniarfiginagit, Issittumilu nunat namminersulersimasut ataqqillugit. Julia Gourley isumaqarpoq Issittumi siunnersuisoqatigiit suunngitsut Nunap inoqqaavi peqataanngippata:
- Tamanna assorsuaq ajunngitsuuvoq pingaaruteqarlunilu. Nunap inoqqaavi issiaqataapput susoqarneranik nassuiaallutik, aarloqqutitillu oqaluttuaralugit. Taamaalilluta issittumi oqaluuserisassani imeqarniarneq ukkatassatut ilanngupparput. Misilittakkat ulluinnarni tamaani inuusunit pissarsiaraavut. Taamaattumik Issittumi siunnersuisoqatigiinni kimigiiserutigissavarput nunap inoqqaavisa isumaat salliutillugit tusaaniarniarlugit, ilinniutigisinnaasatsinnik ilisimasaqarmata, atorfillit qullersaat oqarpoq.
Aamma atuaruk ASSIT Naggueqatitta nunaqarfiat Issittumi Siunnersuisooqatigiit ataatsimiinneranni alutorsaatigineqartoq
