Issittumi Siunnersuisooqatigiinni peqataaneq iluaqutissartaqartoq
Issitumi Siunnersuisooqatigiinni peqataaneq suliffissanik pilersitsinermik kangianiillu aningaasaliisoqarneranik kinguneqarsinnaavoq.
Nunat aningaasaatilissuit Kina, Japan Korealu Issitumi Siunnersuisooqatigiinnut malinnaalereernikuupput, malinnaanertillu nunarsuut sinneranut ersarissarusuppaat. Tamannalu Nunarput suleqatigineratigut pisinnaavoq.
Suleqatigiinnissamut periarfissat
Vittus Qujaukitsup oqaatigaa Nunatta inissisimanini atorluarlugu nunanit kangianeersunit aningaasaliisinnaasunik aningaasaleerusulersitsiniartariaqartoq.
Aamma ineriartornissamut periarfissat allat isigisariaqarput. Aatsitassarsiorneq kisiat pinnagu, aamma takornariaqarneq, niuerneq ilinniartitaanerlu periarfissaapput. Nunatta siuariartorfigisinnaasai arlaqarput, Vittus Qujaukitsoq KNR-imut oqarpoq.
Niueqatigiinnissaq sulissutigineqartoq
Ullumikkut aalisakkat suliareriikkat Kinamut nassiutissagaannit akitsuutit akisuneri aporfiupput. Taamaammat Qujaukitsoq isumaqarpoq Nunatta Kina illugiilluni niueqatigiinnissamik isumaqatiginiartariaqaraa, taamaaliornikkummi Nunarput killeqanngitsumik Kinamut tunisisinnaalissammat.
Ullumikkut aalisakkat Nunatsinni suliareriarlugit Kinamut tuninissai ajornakusoorpoq. Isumaqatigiissusiorsinnaagaannilu tamanna suliffissanik pilersitsisinnaavoq.
Naalagaaffeqatigiit ikioqatigiittut
Kina niueqatigiinnissamut isumaqatigiissusiornissamut pissutissaqarpallaanngilaq. Taamaattorli Nunatta naalagaaffeqatittalu Issittumi Siunnersuisooqatigiinni ilaanerat isumaqatigiissusiornissamut periarfissiisinnaavoq.
Aporfeqanngitumik Kina niueqatigisinnaalernissaa Nunatta kisimiilluni suliassarinngilaa, naalagaaffeqatigiittummi tamanna ataatsimut suliassaavoq, Vittus Qujaukitsoq KNR-imut oqarpoq.