Frankrigip præsidentiata Watsonip Nuummi tigusarineqarnera qisuariarfigigaa
Frankrigip præsidentia Emmanuel Macron Paul Watsonip Nuummi sapaatiummat tigusarineqarneranut tunngatillugu akuliuppoq.
Emmanuel Macronimmi danskit oqartussaasui avatangiisit pillugit ilungersuutillip canadamiusut amerikamiusullu innuttaassusiliusup Paul Watsonip Japaniliaanneqannginnissaanik aalajangeqquai.
Frankrigip præsidentita allaffeqarfianeersut taama ilisimatitsisut, Frankrigimi nutaarsiassaqartitsiviit ilaat AFP allappoq.
Tassa Paul Watson Japaniliaanneqassanersoq eqqartuussivimmi aalajangerneqartinnagu Kalaallit Nunaanni aggustip 15-iata tungaanut tigummigallagaassaaq.
Frankrigimi atsiornernik katersisoqartoq
Paul Watson avatangiisinik illersuiniaqatigiiffimmik Greenpeacemik pilersitseqataasuusoq avatangiisinik illersuisut silarsuaanni oqallisaaqaaq. Taassuma japanimiut Sikuiuitsoq Kujallermi arfannialeruttorneranni akornusersuisimasutut pasineqarluni tigusarineqarnissaa, Japanip oqartussaasuisa 2010-mi naalakkiutigaat.
“Pisoq malinnaaffigigini” Danmarkillu oqartussaasui pisoq pillugu attavigigini, Macron oqarpoq.
Watsonip iperagaanissaanik Frankrigimi nittartakkakkut atsiornernik katersisoqarpoq, atsiornerillu 388.000-t maannamut katersorneqarsimalereerput.
Uumasunik illersuiniatut ilisimaneqarluartoq oqallisaasaqisorlu aamma Frankrigimeersuusoq Brigitte Bardot akuliuttunut aamma ilannguppoq.
- Paulip iperagaanissaa tamaviaarutigissavarput, taanna Frankrigimi aviisit ilaannut Le Parisienimut oqarpoq.
Inatsiseqarnermut ministereqarfik aalajangiisussaatitaasoq
Watson Kalaallit Nunaanni politiinit sapaatiummat tigusarineqarpoq.
Paul Watson Japaniliaanneqassanersoq Danmarkip inatsiseqarnermut ministereqarfia aalajangiisussaatitaasuusoq, Kalaallit Nunaanni politiit ilisimatitsipput.
Paul Watson Japaniliaanneqarnissaminut pinaaserpoq, Japaniliaanneqarpallu tamanna inuttut pisinnaatitaaffiit pillugit Europami isumaqatigiissummik unioqqutitsinerussasoq Japanilu isumaqatigiissummik taassuminnga eqquutsitsinngitsoq taassuma illersuisuisa oqaatigaat.
