Frankrigimi ukiukitsunik atoqateqarsimasut sakkortunerusumik pillarneqartalissasut
Franskit inatsisartui ukiukitsunik atoqateqarsimasunut sakkortuumik pillaasarnissamut silamilu uumisaarisut ingerlaannartumik akiliisinneqartarnissaannik inatsimmik nutaamik pingasunngormat akuersissuteqarput.
Inatsit inatsisartunut ilaasortanit 92-init akuerineqartoq akerlerineqanngitsorlu atuutilermat, 15-it inorlugit ukiulinnik atoqateqarneq pinngitsaaliinertut nalilerneqarsinnaalissaaq.
AAMMA ATUARUK Kinguaassiutitigut kanngutsaatsuliorfigineqartut pilertortumik ikiorneqartassapput
Niviarsiaraq aqqanilinnik ukiulik pillugu suliap malittarisaanik ukiukitsunut kinguaassiuutitigut atornerluineq Frankrigimi ukioq manna oqallisaasorujussuuvoq.
Angutip niviarsiaqqamik aqqanilinnik ukiulimmik atoqateqarsimasup pinngitsaaliisutut unnerluutigineqannginnissaa unnerluussisussaatitaasut aallaqqaammut aalajangeraluarpaat, niviarsiaqqap akuersisimanera patsisigalugu.
Taamaammallu angut ukiukitsumik kinguaassiuutitigut atornerluisimasutut taamaallaat siullermik unnerluutigineqarpoq. Unnerluussulli pinngitsaaliisimanermut sakkortulineqartoq, franskit tv-qarfiata FranceInfop oqaluttuaraa
AAMMA ATUARUK Nakuusa kinguaassiutitigut atornerluisarneq akiorniarlugu suliniummik saqqummersitsisoq
Eqqartuussisut inatsit nutaaq atorlugu ukiukitsunik atoqateqarneq pinngitsaaliinertut nalilersinnaanngorpaat. Meeqqap iliuutsimut paasinninnginneranik iluatsitaarisoqartillugu taama naliliisoqarsinnaavoq.
Inatsit silami kinguaassiuutitigut uumisaarisunut 90 euronik, tassalu 670 koruunit missaannik, aamma akiliisitsisinnaatitsivoq.
/ritzau/dpa
AAMMA ATUARUK Kannguttaatsuliortarneq pillugu innuttaasut ataatsimiittut
