Sisimiut: Kannguttaatsuliortarneq pillugu innuttaasut ataatsimiittut

Kinguaassiuutitigut kannguttaatsuliortarnerup pinaveersaartinneqarnissaanut iliuusissanik isummersornertalimmik Sisimiuni sømandshjemmemi innuttaasunik ataatsimiisitsisoqarpoq. Qeqqata Kommunia tusagassiuutinut nalunaaruteqarluni taama allappoq. 

Kinguaassiutitigut kannguttaatsuliortarnerit akiorniarlugit innuttaasunik ataatsimiisitsisoqarpoq, tamanna Nakuusap nuna tamakkerlugu "Ullut Tamaasa"-mik taaguuteqartumik paasititsiniaanissaa sioqqullugu pivoq. 

Qeqqata kommuniani Borgmesteri, Malik Berthelsen, tikilluaqqusilluni aallarniigami kinguaassiuutitigut kannguttaatsuliornerit Qeqqata Kommunianit unitsinniarneqartut aalajangiusimallugu oqarpoq: 

- Inersimasoq meeqqamik illersuinngippat, taava meeraq meeqqatulli allatut pitsaasumik inuuneqarnissaanut kina illersuisuussava? - meeraq unnuakkut sinissinnaaqqullugu, kina illersuisuussava? Nipangersimaannarnikkut meeqqap atornerlunneqaqqinnginnissaa qanoq isilluta qulakkiissavarput? Malik Berthelsen innutataasunik  ataatsimiisitsinermi taama oqarpoq.