Nakuusa kinguaassiutitigut atornerluisarneq akiorniarlugu suliniummik saqqummersitsisoq

Suliarlu ”Ullut Tamaasa”-mik qulequtsigaq ullumikkut saqqummersippaa.

NAKUUSAp ukiut arlaqanngitsut matuma siorna suliai tassaapput ”Suli anaanamik suli ataatamik” kiisalu ”Kinami oqass’?”.

Massakkullu suliniummi angorusunneqarpoq, inuiaqatigiit ilisimalissagaat, meeqqanut kinguaassiutitigut atornerluisarnerup annertussusia qanoq isikkoqarnersoq, kiisalu innuttaasutut kinguaassiutitigut atornerluisarneq pinngitsoortinniarlugu iliuusissat kialluunniit nalorsaatigiunnaassagai, taamaalilluni kinguaassiutitigut atornerluisarneq appartinneqarniassammat.

Nunarsuaq tamaat isigalugu UNICEF-ip agguaqatigiissillugu missingersuutigivaa meeqqat quliugaangata ataaseq kinguaassiutimigut atornerlunneqartartoq. Nunatsinnilu meeqqat pingasuugaangata ataaseq kinguaassiutimigut atornerlugaasimasarpoq.

- Ajoraluartumik ajornartorsiut siammasingaarmat oqartussat namminerisaminnillu suliniuteqartut kisimiillutik suliaq naammassisinnaanngilaat. Taamaattumillu inuiaqatigiit tamarmik kinguaassiutitigut atornerluisarnermut akiuiniarnermi qanoq iliuuseqaqataasinnaanertik nalornissutigiunnaassavaat,
NAKUUSA-mi suliamik aqutsisoq Najaaraq Møller taama oqarpoq.

TV-kkut radiokkullu sapaatip akunnerini arfinilinni paasititsiniaasoqassaaq.

NAKUUSA meeqqanut kinguaassiutitigut atornerluisarneq pillugu aningaasanik siorna martsip qaammataagaa katersuiniartitsivoq.