Folketingimut qineqqusaartup silap pissusiata allanngoriartornerata akiornissaa pingaarnerutikkusukkaa
Demokraatineersoq Sascha Blidorf Nuummi GUX-imi 2.g-mi ilinniarpoq. Taanna politikkimik soqutigisaqartuaarnarsimalluni oqaluttuarpoq. Aamma silap pissusia soqutigisorujussuuaa.
- Silap pissusaanut tunngassutilinnut ilaasaqattaarnikuuvunga, Sascha Blidorf oqaluttuarpoq.
18-inik ukioqarpoq, tassalu kalaallini Folketingimut qineqqusaartuni nukarlersaavoq. Imminulli inuiaqatigiinnut ilisaritereerpoq. Siusinnerusukkummi silap pissusiata pingaartinneruneqarnissaa anguniarlugu akerliussutsimik takutitsinermik aaqqissuusseqataavoq.
AAMMA ATUARUK - Siunissarput qulakkeerusupparput!
Politikerilli silap pissusiata allanngoriartornera suli naammattumik pimoorunngikkaat Blidorf isumaqarpoq.
- Misiginnginnama tusaatittarluta, taava maannakkut misilillugu nammineq iserniarpunga tassuuna tusaatinniarlunga, Sascha Blidorf oqarpoq.
Nunatsinni partiinit Folketingimut qineqqusaartut
Atassut: Bentiaraq Ottosen, Nikolaj Rosing.
Demokraatit: Nivi Olsen, Steen Lynge, Jens Christian Jakobsen, Sascha Blidorf.
Inuit Ataqatigiit: Anders Jensen, Aqqalukkuluk Fontain, Sofia Geisler, Aaja Chemnitz Larsen.
Nunatta Qitornai: Aleqa Hammond.
Partii Naleraq: Pele Broberg, Kuno Fencker, Regine Møller.
Siumut: Ineqi Kielsen, Jens-Erik Kirkegaard, Ulrikka Holm, Aki-Matilda Høegh-Dam.
Suleqatigiissitsisut: Louis Sigurdsen.
Ilaatigut danskit oqartussaaffiisa nunatsinni pissutsinut pitsaanerusumik naleqqussarnissaat, naalakkersuisunngortitsinermi aalajangiisuusussanngortoqassappat Issittoq pillugu ministereqartitsinissamik piumasaqarneq nunatsinnilu sakkutuunngorniarfeqalernissaq, qineqqusaarutigineqarput.
AAMMA ATUARUK Inuit Ataqatigiit Issittoq pillugu ministerimik toqqaasoqartinniaraat
AAMMA ATUARUK Qallunaat malittarisassaat nunatsinnut naleqqussartariaqarput
Sascha Blidorfilu nunatsinni aaqqitassat allat amerlasut eqqumaffigalugit oqarpoq.
- Pissanganaraluaqalutik kisianni oqarnittut, politikerit silap pissusiata allanngornerata akiorneqarnissaa pillugu arnertuallaartumik sulissuteqanngimmata, uanga tamanna sulissutigerusuppakka, Sascha Blidorf oqarpoq.
