Nuummi akerliussutsimik takutitsisut: - Siunissarput qulakkeerusupparput!

Plastikkimik atuinikinneruleritsi immamilu uumasut sissuerlugit. Silap pissusiata allanngoriartorneranut akerliussutisimik takutitsisut taama oqariartuuteqarput.
marsip 15-at 2019 16:04

Siunissaq isumannaatsoq qulakkeerneqanngippat sooq ilinniassugut? Sooq aamma ilinniarsimasunngussaagut, nunarsuarmi aquttut imikkut ilisimasalinnut tusarnaarneq ajorpata?

Inuusuttut FridaysForFuture-mik aaqqissuussisut taama oqariartuuteqarput. Taakku ullumi atuarnertik immineerlugu silap pissusiata allanngoriartornera akerleralugu ingerlaaqatigiipput.

Nunarsuarmi nunani 100-t missaanneersunit inuusuttut ingerlaatigiinnermi Fridays For Future-mik taaneqartumi, tassa kalaallisuunngorlugu siunissaq pillugu tallimanngornermi, peqataapput. Illoqarfinni 2.083-ini inuusuttut peqataatitaqarput. Aamma nunatsinni Nuummi, Sisimiuni Qaqortumilu politikkerinik iliuuseqaqqusillunik ingerlaaqatigiittoqarluni.

AAMMA ATUARUK Ilinniartut silap pissusia pillugu ingerlaaqatigiittut

Sisimiuni KTI-p ataani GUX-imi ilinniartut ingerlaaqataapput. Nuummi ilinniartut politikkerinut oqaasissaminnik Inatsisartut ataatsimiittarfiata silataani apuussipput.

- Siunissarput qulakkeerniarlugu tamaaniippugut, tamannalu nunatta nunarsuullumi sinnerata paarineratigut angusinnaavarput. Innuttaasut tamatta allanngueqataasinnaavugut, politikkerilliuku aaliangiisinnaassuseqarnermikkut allannguisariaqartut, ”Fridays For Future”-mi oqaaseqartartoq Sascha Blidorf oqarpoq.

Immami uumasut sianigitigit

Nunarsuarmioqatigiit plastikkimik atuivallaarnerisigut mingutsitsineq peqataasunit eqqumaffigineqarluarpoq.

 - Plastikkip atugaannginnerulernissaa uagut oqariartuutigaarput, immamimi uumasunut pisarmat. Atuarfimmi saviit ajassaatillu plastikkit atortarpagut taava nammineq nassartalissaanga puussianillu atunnginnerulerlunga, GUX Nuummi ilinniartoq Camilla Ostermann oqarpoq.

- Torragaara taamatut akerliussutsimik takutitsisinnaasut. Taavalu nunarsuatta imartaani plastikkeqarpallaalersimanera akerleralugu ingerlaaqatigiinnermi peqataavunga, GUX Nuummi 1.b-mi ilinniartoq Mimmi Vold oqarpoq.
Nuummi meeqqat atuarfianni atuartut aamma ingerlaaqataapput.

- Silap allanngoriartornera ajornartorsiuterujussuuvoq. Siku aakkiartupiloorpoq, taamatullu ingerlaannassaguni ajorluinnarpoq, 9. klasseq Oskar Guld oqarpoq.

Meeqqat atuarfiannit peqataasoqarnera aaqqissuusseqataasunit nuannaarutigineqarpoq.

- Meeraapput, qinersisinnaanatillu. Peqataanermikkulli qanoq isumaqarnertik allatigut oqariartuutigaat, Sascha Blidorf oqarpoq.