Qaqortoq: Ilinniartut silap pissusia pillugu ingerlaaqatigiittut

Nunani 125-ni illoqarfinni 2083-init amerlanerusuni meeqqat inuusuttullu silap pissusianut tunngatillugu akerliunertik politikerinut nittarsaappaat. Naalagaaffeqatigiinni illoqarfinni 20-nit amerlanerusuni ingerlaaqatigiittoqarpoq, ilaatigut Nuummi, Qaqortumi, Torshavnimi, Aarhusimi Esbjergimilu.

Nunatsinni Qaqortumi Campus Kujallermi Nuummilu GUX-imi ilinniartut ingerlaaqatigiipput. 

-  Qujanaq taama iliuuseqarnissinnut, qujanarlu nunarsuarput pillugu taama iliorassi, borgmester Kiista P. Isaksen akerliussutsimik takutitsisunut taama oqarpoq.

-  Qujanaq taama iliornissinnut - tapersersorpassi!

Aamma borgmesterip tullia Simon Simonsen akerliussutsimik takutitsisunut qujassuteqarpoq:

- Eqqaamassavarsi ilissi tassaagassi uagut peerutereerutta annerpaamik allanngueqataasussat. Nunamiippugut nunarsuarmi minguinnerpaamik taaneqartartumi, illersorniarlugu iliuuseqartariaqarpugut, Simon Simonsen oqarpoq. 

Riksdagenip saavani akerliussutsimik takutitsisut

Akerliussutsimik takutitsineq taaguuteqartinneqarpoq Fridays For Future, Sverigemilu atuartumit silallu pissusia pillugu ilungersuuteqartumit Greta Thunbergip aallartinneqarluni. Taanna Stockholmimi Riksdagenip saavani ullut tamaasa akerliussutsimik takutitsisalernini nunarsuaq tamakkerlugu tusaamaneqaatigilerpaa. 

- Amerlaqisut atuariartoqquaannga, kisianni sooq atuassaanga siunissaaruteratarsinnaallunga, Greta Thunberg DR-imut taama oqarpoq. 

Taanna silap pissusia pillugu ataatsimeersuarnermi COP24-mi Polenimi Katowicemi pisumi nunat siuttuinik appisaluussinermi kingorna nunarsuup ilarujussuani ilisimaneqalerpoq.