Mandag er de to grønlandske folketingspolitikere, Aaja Chemnitz Larsen fra IA og Aki-Matilda Høegh-Dam fra Siumut, sammen med justitsminister Nick Hækkerup gået i gang med at forhandle om de penge, der blev afsat til retsområdet i Grønland i den danske finanslov.Assi: Steen Brogaard, FT / KNR edit

Folketingimut ilaasortat eqqartuussiveqarnermut 50 millionit koruunit pillugit: Politiit akissarsiaat qaffanneqassapput

Eqqartuussiveqarnermut 50 millionit koruunit isumaqatigiinniutigineqarnerat aallartinneqarpoq. Kalaallit politiivi minnerpaamik savalimmiormiutulli akissarsiaqartinneqartariaqarput, Aaja Chemnitz Larsen oqarpoq.

Nunatsinni politiit akissarsiaqarnerulissapput danskinullu suleqataannut naligiissinneqassallutik.

Kalaallit folketingimut ilaasortaatitaasa marluk, tassa Aaja Chemnitz Larsenip Aki-Matilda Høegh-Damillu tamanna isumaqatigiissutigaat. Tamannali qanoq pissanersoq assigiinngitsumik oqariartuuteqarfigaat.

Politikerit nunatsinnut eqqartuussiveqarnermut 50 millionit koruunit danskit aningaasanut inatsisaanni immikkoortinneqartut pillugit inatsiseqarnermut ministeri, Nick Hækkerup ataasinngornermi isumaqatigiinniaqatigilerpaat.

AAMMA ATUARUK Politiforbundet om ekstra millioner: Glad - men forbeholden

IA-p Savalimmiuni qaffasissutsip assinga angorusuppaa

Aaja Chemnitz Larsenip politiit akissarsiaanni sumiiffigisami akissaatinut tapisiatut taaqartartut qaqikkusuppaa. Taassuma oqarnera naapertorlugu kalaallit politiit akissarsiaat savalimmiuni akissarsianut minnerpaamik naleqquttariaqarput.

Politiinut sumiiffigisami akissaatinut tapit pillugit:

  • Danmarkimi politiit akissarsiaat nunap suani sulinerluni apeqqutaallutik allanngorartarput.
  • Sulisup nunami sumiiffigisaa apeqqutaalluni sumiiffigisami tapit aalajangerneqartarput.
  • Nunatsinni akissarsiat tungnaviusumik appasinnerupput, taamaammat naligiissaarinermut tapeqartarput.
  • Naligiissaarinermut tapit danskit politiivisa sumiiffigisami tapiinut, qaffasissutsimini 0-imiittunut naleqqussarneratigut naatsorsorneqartarput.
  • Bornholdimi politiit sumiiffigisami tapii 2-miipput, Københavnimilu politiit sumiiffigisami tapii 6-imiillutik.
  • Savalimmiuni politiini sulisut Danmarkimi akissarsiaritinneqartutulli akissarsiaqarput, sumiiffisamilu tapii 3-miillutik.
  • Sumiiffigisamut tapit 0-imiittut nunatsinni atorneqartut Christiansømi aamma atorneqarput. Tassanili politiinik sulisoqanngilaq.

Tigusiffik: Politiit Kattuffiat aamma Inatsiseqarnermut ministereqarfiup ataani suleqatigiissitaq

- Naalagaaffeqatigiit iluanni naleqarnerusutut misiginermik kinguneqassaaq, Aaja Chemnitz Larsen oqarpoq.

Akissarsiani sumiiffigisamut tapit nunap suaniinneq aallaavigalugu annertussusilerneqartarput, kisitsisikkaartumillu qaffakkiartortuullutik.

Nunatsinniittunut sumiiffigisamut tapit Danmarkimi 0-imiittut assigaat, Savalimmiunilu politiit Danmarkimiittutulli qaffasissutsimi 3-miillutik.

- Naalagaaffeqatigiinni akissarsianik iliuuseqartarnermi assigiinngitsut marluk atorneqarput. Danskit savalimmiormiullu assigiimmik akissarsiaqartinneqarput, kalaallillu akissarsiakinnerullutik. Tamanna allanngortinniarparput.

- Taamaammat assigiinngitsut misissorneqartariaqarput. Sumiiffigisaq apeqqutaatillugu tapeqartitsisarnerit pitsaanerusumik aaqqiissuteqarfiusariaqarsoraarput, taamaaliornikkut naalagaaffeqatigiinni immikkoortut pingasut naligiinnerulissallutik, Aaja Chemnitz Larsen oqarpoq.

Politiit Kattuffiata oqarnera naapertorlugu akit 3-mut qaffanneqaraluarunik nunatsinni politiinngorlaaq naligiissaarinermut tapit ilanngullugit ukiumut 12.899 koruuninik akissarsiaqarnerulissagaluarpoq.

Tamatuma saniatigut nunatsinni politiit sapaatip akunneranut akunnerit 40-t sulisarput, Danmarkimilu politiit sapaatip akunneranut 37 tiimit sulisarlutik.

Siumut: Akissarsiat assigiinnginnerata erseqqissuliarineqarnera pingaaruteqarpoq

Poliinngorlaat tunngaviusumik akissarsiaqartinneqarnerat:

Danmarkimi: 26.601 koruunit. Politiitut akissarsiaqartut tapii ilanngullugit soraarnerusutisiassaalu ilanngunnagit agguaqatigiissillugit taama akissarsiaqarput. Københavnimi atorfeqartut assersuutigalugu qaffasinnerusumik akissarsiaqarput.

Kalaallit Nunaanni. 25.680 koruunit. Nunatsinni politiit naligiissaarinermut tapii allallu tapii ilanngullugit soraarnerusutisiassat ilanngunnagit qaammammut taama akissarsiaqarput.

Tigusiffik: Inatsiseqarnermut ministereqarfiup ataani suleqatigiissitaq

Inatsiseqarnermut ministereqarfiup suleqatigiissataq Danmarkimi nunatsinnilu politiini akissarsianik atorfinitsinneqarnermilu atugassarititaasunik qulaajaasussanngortillugu 2017-imi pilersippaa. Suleqatigiissitap nunatsinni politiit danskinit suleqatiminnik akissarsiakinnerungaatsiartut allakkani uppernarsaatini assigiinngitsuni uppernarsarlugu tallimanngormat saqqummersippaa.

Kisitsisit allaganngorlugit erseqqissarneqarnerat isumaqartorujussuusoq Siumumit, Aki-Matilda Høegh-Damip nalilerpaa, taassuma oqarnera naapertorlugu akissarsiat assigiinnginnerat amerlasuutigut takunngitsoorneqartarput.

AAMMA ATUARUK 49,2 millionit koruunit nunatsinni inatsiseqarnermut susassaqarfimmut immikkoortinneqartut

- Allakkatigut uppernarsarneqaruni oqaatsitigut assortuunneruinnarnerujunnaassaaq. Taamaalilluta piffissami sivisuumi anguniakkatta isumaqatigiinniutiginissaa ajornannginnerulissaaq, Aki-Matilda Høegh-Dam oqarpoq.

Sumiiffigisaq apeqqutaatillugu akissarsianut qaffasissusiliisarneq ukkatarinagu politiit tunngaviusumik akissarsiaat misissorneqassasut, Aki-Matilda Høegh-Dam naliliivoq.

Taassuma politiit tunngaviusumik akissarsiaasa qaffannissaannut ukiumi siullermi 3 millionit koruunit immikkoortinneqarnissaat siunnersuutigaa.

- Tamatuma qanoq ataavartunngortinneqarnissaanut Inatsiseqarnermut ministereqarfiup isumaqatiginiarnera apeqqutaavoq, Aki-Matilda Høegh-Dam oqarpoq.

Aki-Matilda Høegh-Damip oqarnera naapertorlugu akissarsianik qaffaaneq politiinngortitsiniarnermut sulisoqaannarniarnermullu ajornannginnerulersitsissaaq.

Ministerip isumaqatigiinniarnerit uppernarsarai

Inatsiseqarnermut susassaqarfimmut ukiunut tulliuttunut sisamanut 49,2 millionit koruuninik immikkoortitsisoqarpoq

2020: 10 mio.
2021: 13,2 mio.
2022: 13,7 mio.
2023: 12,3 mio.

Atlantikup avannaanut aningaasaliissutit agguataarnerat ataatsimoortoq ilanngutassiap naanerani nassaarisinnaavat.

Tigusiffik: Aningaasaqarnermut ministereqarfik

Inatsiseqarnermut ministerip aningaasat danskit aningaasanut inatsisisaanni immikkoortinneqartut pillugit isumaqatigiinniartoqartoq KNR-imut uppernarsarpaa.

- Uanga kalaallillu folketingimut ilaasortat marluk akornanni Inatsiseqarnermut ministereqarfimmi isumaqatigiinniarnerupput tusagassiuutinoornatillu, Nick Hækkerup oqarpoq.

Aningaasat 50 millionit koruuningajaat Savalimmiuni nunatsinnilu ineriartortitsinissamut suliniutinut atorneqartussanit, Atlantikup Avannaamiunut aningaasaliissutinit nuutsinneqarput.

Aningaasat ukiunut sisamanut agguarneqassapput.

Politiit akissarsiaat folketingimi ilaasortat isumaqatigiinniarnermi sammisaasa ilagiinnarpaat.

Aki-Matilda Høegh-Damip Aaja Chemnitz Larsenillu nunatsinni pinerluuteqarsimasunut inissiisarfinni nakutilliisut Danmarkimilu parnaarussivinni nakkutilliisut akissarsiaasa assigiinngissusaat ilaatigut aamma misissorniarpaat.

Aaja Chemnitz Larsenip isumaqatigiinniarnerit qaqugu naammassinissaat naatsorsuutigineqarnersoq qulakkeerlugu oqaatigisinnaanngilaa, 2020-mili januaarimi tamanna pinissaa neriuutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat