Danmarkimit aningaasat amerlanerusut: Nuannaarutigineqarput - nangaasumilli
- Tassa soorunami nuannaajallannarpoq taamatut tusagaqarluni immikkut taamatut aningaasaliisoqarneranut. Taanna ukiorpassuarni anguniagaritoqangatsigu. Alloriarnerujussuartut isigisariaqarpoq, Jesper Fleischer, Kalaallit Nunaanni Politiit peqatigiiffianni siulittaasoq oqarpoq.
Taassuma qisuariarfigisaa tassaavoq inatsisinut atuutsitsinermut nunatsinni susassaqarfinnut 49,2 millioner koruuninik danskit aningaasaqarnermut inatsissaatigut aningaasaliineruniarneq.
Danmarkimi parnaarussalerisut kattuffiat KNR-imut ippassaq oqarpoq kalaallit inissiisarfinni paarsisut aningaasarsiaqarnerulersinnaanerat kattuffimmit nuannaarutigineqartoq. Kalaallit Nunaannili politiit peqatigiiffiat nangaassuteqarneruvoq.
AAMMA ATUARUK Inissiisarfinni paarsisut aningaasarsiaqarnerulersinnaanerat nuannaarutigineqartoq
- Kisianni una alloriarnertut isigiinnartariaqarpoq ukiunut sisamanat tullernut isumaqatigiissutaangami. Uagut anguniagarput imaakkami piffissaligaanngitsumik akissaatit tungaasigut assigiimmik atugassaqartitaanissaq, Jesper Fleischer oqarpoq.
Taamaattorli - soorlu Danmarkimi parnaarussalerisut kattuffiat ilaasortaminut kissaateqartoq - aamma nammineq ilaasortami atugaanut pitsaanerulersitsoqarsinnaaneranut neriuuteqarpoq.
- Politiit amerlisarneqarnissaat, taavalu atukkat pitsanngorsaavigineqarnissaat soorunami kissaatiginarpoq. Aamma politiit takussaanerulernissaat sumiluunniit kissaatigineqartuaannarmat innuttaasunik toqqissisimatitsinissaq anguniarlugu, Jesper Fleischer oqarpoq.
AAMMA ATUARUK 49,2 millionit koruunit nunatsinni inatsiseqarnermut susassaqarfimmut immikkoortinneqartut
Jesper Fleischer naapertorlugu Danmarkimi aamma nunatsinni politiinngorniarluni ilinniarnerit tunngavimmikkut assigiipput, nunatsinni ilinniarnerup annikitsunnguamik allaanerussuteqarnera eqqaassanngikkaanni.
- Taamaattumik sulinermi atukkat taavalu akissarsiat, soorlu ernereernerup kingorna sulinngiffeqartarnerit, assigisaallu, assigiilernissaat soorunali aamma anguniarpagut, Jesper Fleischer oqarpoq.
Kalaallit Nunaanni Politiit inatsisinut atuutsitsinermut susassaqarfinnut aningaasaliineruniarneq pillugu suli oqaaseqarusunngikkallarput, aningaasaliissutigineqarniartut agguarnissaat suli politikkikkut isumaqatigiinniutigineqarmat.