Folketingimi oqallinnermi kalaallisuinnaq oqalunneq Siumup siulittaasuata taperseraa
Folketingip ukiumoortumik naalagaaffeqatigiinneq pillugu oqallititsisarnerani tallimangormat pisumi, nunarput sinnerlugu folketingemi ilaasortap Aki-Matilda Høegh-Damip oqaluttarfimmi kalaallisuinnaq oqalunnera Siumup politikkianut naapertuuttoq, Siumup siulittaasua Erik Jensen KNR-mut oqarpoq.
- Siumumiit isumaqarpugut, inuiaat kalaallit oqaatsiminnik atuisinnaanerisa nukittorsarneqarnissaat inissaminiilluinnartutut isigaarput. Taamaattumik folketingimi suleriaatsiminnik eqqarsariaallatsinneqarnerat aammalu ullutsinnut tulluarsaasoqartariaqarneranik eqeersitsisoqarpoq, Erik Jensen oqarpoq.
Oqallinneq tamanit paasineqarsinnaasariaqartoq
Erik Jensen naapertorlugu, Aki-Matilda Høegh-Damip tallimanngormat oqallinneq aallartitaa nunatsinni Inatsisartut ataatsimiittarfianitulli toqqaannartumik nutserisoqartarneratulli folkeingimi nutserisoqartalersinnaaneranik noqqaanerusoq.
Taannami Aki-Matildatulli isumaqarpoq, tassa; naalagaaffeqatigiinnerup iluani inuit tamarmik imminnut tunngassuteqartunik oqallittoqartillugu paasinnissinnaasariaqartut, nunatsinnimi najugallit amerlasuut namminneq imminut oqaatigisarmata qallunaatut paasillutillu oqalussinnaanertik naammanngitsoq.
- Suleriaaserput nutartertariaqarpasilerpoq, naalagaaffeqatigiinnerup iluani oqaatsit allat aamma paasisinnaanissaannik oqariartortoqarpoq, soorlu aamma maani Inatsisartuni periarfissiissutaasarpoq toqqaannartumik nutserisoqartarpoq, naalagaaffeqatigiit iluani aamma taamatut periarfissiisoqarnissaanik oqallinneq taamaalilluni ikippoq, Erik Jensen oqarpoq.
Siulersuisut ilisimatinneqarnersut oqaatigerusunneqanngilaq
Aki-Matilda Høegh-Dam folketingip oqaluttarfiani kalaallisuinnaq oqalulermat tupaallaatigineqaqaaq. Siumumili siulittaasup Erik Jensenip oqaatigerusunngilaa taassuma taama iliornissaa sioqqullugu Siumut ilisimatinneqarsimanersoq.
- Oqaaseqarfigisinnaanngilara, oqaatigisinnaavarali maaji naalerpat siulersuisuni oqaluuserissagatsigu, kalaaliusugut oqaatsigut pingaartippagut, oqarpoq.
Aki-Matilda tallimanngormat KNR-mut oqarpoq, partiip tunaartai malikkini.
- Uanga tamanna namminersuutiginngilara. Siumup politikkiani allassimavoq kalaallisut oqaatsigut pingaartikkigut taakkulu sorsuutigisussaagigut.
Erik Jensenip ilisimatitsissutigaa, Siumumi siulersuisut maajip naalernerani ataatsimiittussaasut aammalu pineqartoq pillugu tamatuma kingorna aatsaat oqaaseqaqqissinnaalluni.
