Folketingi ataatsimiittarfimmi kalaallisut oqaluttoqarnissaanut aaqqiissutissarsiorniartoq
Nunatsinni folketingimut ilaasortap, Aki-Matilda Høegh-Damip Folketingip ataatsimiittarfiani kalaallisut oqalunniarluni maajimi aalajangernera oqallisigineqangaatsiarpoq.
Folketingimi kalaallisut savalimmiormiusullu oqaluttoqarsinnaanissaanut nunanit avannarlernit kissaateqartoqarnerata kingorna aaqqiissutissarsiortoqassasoq Folketingip Siulittaasoqarfiani ataatsimiittoqarnerata kingorna aalajangerneqarpoq.
Folketingimi kalaallisut savalimmiormiusullu oqaluttunit toqqaannartumik nutserisoqartitsinissaq ukiumut 200 millionit koruuninik akeqarnissaa missingersuutaagallartoq Siulittaasoqarfik tusagassiuutinut nalunaarummi allappoq.
Tamatuma saniatigut pilersitsinermut aningaasartuutit 40 millionit koruunit missaanniissapput.
Ataatsimiinnermi toqqaannartumik oqaluttaasoqarnera kisimi pineqanngilaq, allagaatilli inatsisartuni ilaasut nutserneqarneri aamma ilaapput.
Inatsisartuni allagaatit quppernerit ukiumut ikinnerpaamik 150.000-iusassasut nalunaarummi allassimavoq.
Aki-Matilda Høegh-Damip Danmark piviusumik naalagaaffeqatigiinniikkuni oqaatsit tamarmik inissaqartissinnaassagai oqaatiginikuuaa tassanilu ataatsimiittarfimmi kalaallisut oqalugiarnini innersuussutigalugu.
Folketignip siulittaasuata, Søren Gadep siulittaasoqarfiup Kalaallit Nunaanit Savalimmiuniillu ilaasortat namminneq oqaatsiminnik Folketingimi oqalussinnaanissaminnik kissaateqarnerat paasisinnaagaa tusagassiuutinut nalunaarummi oqaatigaa.
- Siulittaasqarfiup oqaluuserinninnerata kingunerisaanik Folketinip inatsisartuni suliaqarnermi oqalutseqarnissamut apeqqut qanoq iliuuseqarfigisinnaaneripput pillugu assigiinngitsunik siunnersuuteqartoqarnissaanik allattoqarfik piumasaqarfigaarput, taanna oqarpoq.
Folketingimi tunngaviusumik danskisut oqaluttoqartarpoq, kisianni tunngaviusumik inatsit imaluunniit Folketingip sulinerata ingerlarngata aaqqissuunnerani kalaallisut savalimmiormiusulluunniit ataatsimiittarfimmit oqaluttoqarnissaanut aporfiliisoqanngilaq.
Naalagaaffeqatigiit pillugit maajip qiteqqunnerani oqallinnermi Aki-Matilda Høegh-Dam kalaallisut oqalunniarluni aalajangerpoq.
Taannalu oqalugiarnermi kingorna folketingimi ilaasortanit allanik aperineqaraangami kalaallisuinnaq akissuteqartarpoq, tamannalu tupigutsaatigineqarpoq.
SF-imit Karsten Høngep pisoq "kalaallit tusagassiorfianit atorneqarnissaa piinnarlugu isiginnaartitsinermi ilaaginnarniarani" ilaatigut oqaatigaa.
Aki-Matilda Høegh-Damip aalangerneq inatsisartut pingasunngornermi unnukkut nalunaaruteqarnera kingorna suli oqaaseqarfiginngilaa.
/ritzau/
