Savalimmiormiunit folketingimut ilaasortat pisoqarnerata kingorna: Ataatsimiittarfimmi danskisut oqaluttarpugut
![Folketingssalen](/sites/default/files/styles/image_934x467/public/folketingssalen-001.jpg?itok=6QWAiBuA)
Danskit Folketingianni danskisut oqaloqatigiittoqartarpoq.
Savalimmiunit folketingimut ilaasortat oqaaseqartarfimmit kalaallisut oqalunneq pillugu oqallittoqalereersorlu taama oqarput.
Anna Falkenberg partiimit Sambandsflokkurinimeersoq folketingimut qinigaavoq.
- Danskit Folketingianniippugut. Danskisut oqaluttarpugut, pissutigalugu danskisut immitsinnut paasisinnaagatta. Oqaatsit taakku atorlugit oqaloqatigiissinnaavugut, taanna oqarpoq.
Oqalunneq oqallisaasoq
Nunatsinnit folketingimut ilaasortaq, Aki-Matilda Høegh-Dam (Siumut) naalagaaffeqatigiinneq pillugu tallimanngornemri oqallinnermi oqaaseqartarfimmit kalaallisut oqalunniarluni aalajangerpoq.
Taannalu folketingimi ilaasortat apeqquteqaraangata kalaallisuinnaq aamma akisarpoq.
Taassuma qanoq oqarnera Folketingimi peqataasut paasisinnaanngilaat.
SF-imit Karsten Hønge naammatsittut ilagaat.
- Kalaallit tusagassiorfiini atorneqartussaanera piinnarlugu pisumi akuunianngilanga, Karsten Hønge oqarpoq.
Savalimmiormiusut oqalunnissaq pisariaqanngitsoq
Aki-Matilda Høegh-Damip kalaallit tamarmik danskisut paasisinnaanngitsut tallimanngornermi oqallinnerup kingorna erseqqissaatigaa.
- Oqaluttarfimmi suli qallunaatut taamaallaat oqaluttarnerput nunasiaataanermit amiakkuuvoq. Danmark piviusumik naalagaaffeqatigiiugaluarpat, tamatta oqaatsivut aamma inissaqartinneqassagaluarput, taanna oqarpoq.
Anna Falkenbergip oqaaseqartarfimmit savalimmiormiusut oqalunnissaq pisariaqanngissoraa.
- Soorunami savalimmiormiusut oqalukkusunnerusoqassaaq, kisianni savalimmiormiut tamarmik danskisut paasisinnaapput. Taamaammat kikkut tamarmik paasisinnaasaannik oqaluttoqarnissaa siunertaappat savalimmiormiusut oqalunnissaq pisariaqartorujussuutinngilara, Anna Falkenberg oqarpoq.
Sjúrður Skaale, Savalimmiuni partiimit Javnaðarflokkurinimeersuuvoq.
- Savalimmiormiusut oqalunnissara aporfissaqartinngilara. Kisianni savalimmiuni inatsisartuni savalimmiormiusut oqaluttarpugut, Folketingilu naalagaaffeqatigiit ataatsimiittarfiunani Danmarkimi inatsisartutut isigaara.
- Taamaammat danskisut oqaluttarpunga. Tassa taamaappoq, Sjúrður Skaale oqarpoq.