Folketingip kalaallisut savalimmiormiutullu nutserisoqartarnissaa juunimi oqaluuserissagaa
Folketingimut ilaasortap, Siumumeersup, Aki-Matilda Høegh-Damip Folketingip oqaaseqartarfianit tallimanngormat kalaallisut oqalunnera oqallisaangaatsiarpoq.
Naallu Folketingimi danskit ilaasortat apeqquteqarfigaluaraangaminni ilitsoqqussaralugu oqaatsini atorlugit akisarpoq.
Danskit kalaallillu qinikkat naalagaaffeqatigiinneq pillugu oqallinnermi oqalugiaammut atatillugu qisuariaateqarput.
Maanna Folketingip Siulittaasoqarfiata ataatsimiittarfimmi kalaallisuumit savalimmiormiusuumiillu muminganiillu toqqannartumik nutserisoqartalissanersoq tulliani ataatsimiinnerminni tassa juunip 14-iani oqaluuserineqarnissaa aalajangerpaat. Ritzau taama allaaserisaqarpoq.
Folketingimi isummat marluusut
Politikerit arlallit oqalugiarnermi naluuttut Aki-Matilda Høegh-Damimik isornartorsiuipput.
SF-imit Karsten Hønge naammatsittut ilagaat.
- Kalaallit tusagassiorfiini atorneqartussaanera piinnarlugu akuuinnarnianngilanga, Hønge oqarpoq.
Aamma Danmarksdemokraternemit Peter Skaarupip pisoq toorlannerarpaa.
- Danskit folketingianni oqalunniaraanni tamanna danskisut ingerlanneqartariaqarpoq. Taamaanngippat isumalluutissaqartoqarnavianngilaq, taanna Twitterikkut allappoq.
Aki-Matilda Høegh-Damili oqallinnerup kingorna allanit taperserneqarpoq.
Enhedslistenip Aki-Matilda Høegh-Damip Folketingip ataatsimiittarfiani toqqaannartumik oqaluttaasoqartalernissaanik kissaateqarnera taperserlugu ullumi nalunaarutigaa.
Tamanna Folketingip Siulittaasoqarfianut Enhedslistenimit Kalaallit Nunaannut tunngasunik oqaaseqartartumit, Trine Pertou Machimit saaffiginnissummi Ritzau-ip takusaani allassimavoq.
- Inatsisartuni ukiorpassuani kalaallisut danskisullu oqaluttut toqqaannartumik nutserneqartarput. Periarfissaq tamanna Folketingimi aamma periarfissaasariaqaraluarpoq.
- Naalagaaffeqatigiit ilaani allani ikinngutitsinnut ataqqinninneq aamma toqqannartumik nutserisoqartanngikkuni tamanna Kalaallit Nunaanni Savalimmiunilu innuttaasunut, danskisut ilitsoqqussaralugu oqaaseqanngitsunut demokratiimut naleqqutinngitsumik mattussinermik kinguneqaratarsinnaanera pissutigalugit, Trine Pertou Machip saaffiginnissutaani allassimavoq.
