Ilisimatooq Siumumi pisut pillugit: Tukappasipput
- Ilisimatoorpalaanngitsumik oqassaguma uani pisut tukattutut oqaatigisinnaavakka, Birger Poppel oqarpoq.
Aalisarnermut ataatsimiititaliamiit aalisarnermut naalakkersuisumut, Jens Immanuelsenimut tatiginnikkunnaarlutik nalunaaruteqarmata suliaq aallartippoq.
Henrik Fleischerip Siumumiit ilaasortaajunnaarsinneqaraluarnera Siumup iluani paatsooqatigiinneq Siumullu malittarisassaanik ilisimasakinneq pissutaasoq kingusinnerusukkut nassuiaatigineqarpoq.
AAMMA ATUARUK Henrik Fleischer Siumumit tunuartitaasinnaanerminut: Paatsooqatigiittoqarpoq
- Siumup iluani oqaloqatigiilluannginnermik ersersitsivoq. Allatut paasineqarsinnaasorinngilara, Birger Poppel oqarpoq.
Henrik Fleischerili kukkusimalluni nalunaaruteqarpoq, Siumumilu ilaasortaaginnarluni. Taamaammat suliaq ilungersunarujussuanngitsoq, Birger Poppel oqarpoq.
Siumumili ulluni makkunani pisuni taannaannaanngilaq, Birger Poppelimmi partiip allatsigisimasaata Mikael Petersenip kinguaassiuutitigut innimiilliorsimaneragaanera aamma eqqaasitsissutigaa.
- Inuit ataasiakkaat pillugit oqallinnerit politikikkut sulianut tunulliutsitsipput, Birger Poppel oqarpoq.
AAMMA ATUARUK Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat
Taassuma politikikkut suliat angisuut ilaatigut aalisarnermut inatsit, uuliasiornermut periusissiaq Issittorlu pillugu periusissiaq pillugit oqallinnerit tunulliunneqartutut taavai.
Henrik Fleischer pillugu suliaq Siumumit Inatsisartunut ilaasortat akornanni Kim Kielsenimut sivisuumik tatiginninngittoqarneranut atassuteqartoq, Poppel ilanngullugu oqarpoq.
AAMMA ATUARUK Aalisarnermut ataatsimiitsitaliami ilaasortat: Siumumi eqqissiviilliorneq peqqutigalugu suliat uninngapput
Inatsisartunut ilaasortat arfinillit Naalakkersuisunullu ilaasortaq Kim Kielsenip partiimi siulittaasutut tunuarnissaanik siorna aggustimi piumasaqarput.
Kielsenip taamani tunuartitaanngilaq, partiilli siulittaasussaanut aasaru qinersisoqassaaq.
- Siumup iluani isorliit akiuunnerannik oqarneq akerlilerusunngilara. Taamaattoqarneralu siulittaasunngorniunnermut aallartisaanertut immaqa taaneqarsinnaavoq, Birger Poppel oqarpoq.