Filmiliortartut siulittaasuat: Isiginnaagassiaq nangeqattaartoq tulluusimaarutigilluarsinnaagipput isumaqarpunga
Kalaallit Nunaat TV-kkut aallakaatitassiat unnukkut aallakaatinneqartarfiini pingaarutilittut ulluni makkunani inissisimavoq. Nangeqattaartuliarmi nuannarineqarluartoq "Borgen" DR-ikkut ulluni makkunani aallakaatinneqaqqittalerpoq.
- Isiginnaartitsisartunik Kalaallit Nunaanneersunik peqataasoqarnera nuannaarutissaavoq, immiussisoqarneratali nalaani suliffeqarfimmik Kalaallit Nunaanneersumik aamma sullissisoqarpoq, Nunatsinni filmiliortartut peqatigiffiata siulittaasua Klaus Georg Hansen taama oqarpoq, nangipporlu:
- Tamanna pissutaalluni isiginnaartitsisartut saniatigut sulisut allat immiussinermi aamma atorneqarsimallutik, tamanna nuannaarutissaavoq, Klaus Georg Hansen oqarpoq.
DR-ip nangeqattaartuuliaa "Borgen" politikkimik tunngaveqartumik pissanganartuliaalluni pingaarnertut Issittumi pisimasuusaartinneqarpoq.
AAMMA ATUARUK Nunatsinni uuliamik nassaarneq pillugu tv-kkut isiginnaagassiaq pissanganartuliaq naliliisartunit nuannarineqartoq
Isiginnaagassiami inuttaasoq pingaarneq Birgitte Nyborg Danmarkimi nunanut allanut ministerinngorlaatut, nunarsuarmi nunat nuimanersat akornanni issittumi pissaaneqarniunermi akerleriinermut akuliutsitaavoq.
Isiginnaartitsisartut, filmiliortartut allallu nunatsinni immiussinermi peqataasut misilittagaqarlualersut Klaus Georg Hansenip oqaatigaa, politikerillu nunatsinni filmiliortarnerup piorsaavigineqarnerunissaanut peqataanerunissaat ujartorlugu:
AAMMA ATUARUK TV-kkut nangeqattaartuuliami Kalaallit Nunaat pingaarnertut inissisimassasoq
- Nunatsinni politikerit nangeqattaartuliaq aamma isiginnaarpaat. Kalaallit Nunaatalu filmiliornermi, uanilu nangeqattaartuliornermi peqataanerusinnaanissaa pillugu politikerit piorsaaqataasinnaanissaat neriuutigaara. Filmiliornermi aningaasarsiorfiusinnaavoq, aamma Kalaallit Nunaannut, Nunatsinni filmiliortartut peqatigiiffiata siulittaasua Klaus Georg Hansen KNR-imut oqarpoq.
Svend Hardenberg, Ujarneq Fleischer, Rasmus Lyberth, Angunnguaq Larsen, Kiki Godtfredsen, Krissie Berthelsen Winberg Nivi Pedersenilu isiginnaagassiami ilaatigut peqataapput.
Naalakkersuisoqarfimmi pisortaasimasoq peqataasoq
Ujarneq Fleischer, Rasmus Lyberth, Angunnguaq Larsen, kiki Godfredsen, Krissie Berthelsen Winberg Nivi Pedersenilu ilaatigut peqataapput. Svend Hardenbergilu isiginnaagassiami nunanut allanut tunngasunut aatsitassanullu naalakkersuisutut, Hans Eliassenitut inuttaavoq.
- Isiginnaartut isiginnaagassiaq inuttaaffigalugu qanoq igissaneraat pissanganarpoq, taanna KNR-imut sapaatit-akunnerata naanerani oqarpoq.
AAMMA ATUARUK Hardenberg TV-kkut nangeqattaartuliap Borgenip aallakaatinneqarnissaa sioqqullugu pissangasoq
Isiginnaartitsisartutut siullermeerluni saqqummertoq nunatsinni ilisimaneqarluarpoq.
Ilaatigut KNI-p siulersuisuini siulittaasutut qinigaaqqammerpoq, Nukissiorfimmilu siusinnerusukkut pisortaalluni.
Aamma Naalakkersuisut siulittaasuata naalakkersuisoqarfiani pisortatut atorfeqarnikuuvoq, politikeriunikuunngikkaluarlunilu, politikkimi pissutsinut ilisimasaqarluarpoq.
