TV-kkut nangeqattaartuuliami Kalaallit Nunaat pingaarnertut inissisimassasoq
Ilulissani Nuummiluunniit najugaqaruit danskit isiginnaartitsisartuat Sidse Babett Knudsen filmiliortartullu ulapputeqartut imaasinnaavoq naammattoorsimassagitit.
Tv-kkut nangeqattaartuliami nutaani 'Borgen'-imik taaguuteqartumi pingaarnertut Kalaallit Nunaat inissisimaffigineqassaaq, 2022-illu aallartinnerani aallakaatinneqarumaarpoq.
AAMMA ATUARUK Isiginnaagassiortup oqaluttuatoqqat uummaarissunngortikkai: Oqaluttuatsialannik toqqorsimasoqarpoq
Isiginnaagassiami inuttaasoq pingaarneq Birgitte Nyborg (Sidse Babett Knudsen), Danmarkimi nunanut allanut ministerinngorlaatut, nunarsuarmi nunat nuimanersat akornanni issittumi pissaaneqarniunermi akerleriinermut akuliutsitaavoq.
Oqaluttuaq qanoq imaqarneranik isiginnaagassiortunit oqaatigineqarsinnaanngilaq, unalu nalunanngilaq, isiginnaartitseqataasut arlaqartut kalaaliummata.
Tulluusimaarnaqaaq
Ilaatigut Svend Hardenberg, Ujarneq Fleischer, Rasmus Lyberth, Angunnguaq Larsen, Kiki Godtfredsen, Krissie Berthelsen Winberg Nivi Pedersenilu isiginnaagassiami takuneqarsinnaasapput.
- Isiginnaagassiami 'Borgen'-imi aallakaatitassiassani nutaani peqataalluni tulluusimaarnaqaaq. Isiginnaagassiaq annertuvoq, isiginnaartitsisut isiginnaagassiortullu pikkoreqaat. Isiginnaagassiamik annertuunik suliallit malinnaavigalugit pissarsiaqarnaqaaq, uangami isiginnaagassiaaqqanik misilittagaqareerama, tusagassiortunik katersortitsinermi Nivi Pedersen oqarpoq.
AAMMA ATUARUK Kuannersuit pillugit filmi naatsuliaq festivalit annerit ilaanni takutinneqartussanngortoq
Taasumallu Kalaallit Nunaanni immiussat arlaqartut ingerlanneqarsimammata nuannaarutigaa:
- Maani suliatsinnut inuussutissarsiutigalugu kalaallinik amerlanerusunik suliqartoqalersinnaanera taamaalilluni annertusarneqassaaq.
Asannilersoortoq
Nivi Pedersenip inuttaaqqataa danskit isiginnaartitsisartuat Mikkel Boe Følsgaard, isiginnaagassiornissamut Kalaallit Nunaannukartariaqarsimanini alutoreqaa.
- 'Borgen'-imi inuttaaffigisara assigalugu Kalaallit Nunaannut alutonartorsuarmut kusanangaaqqisumullu asannilersoorpunga. Nammineq Kalaallit Nunaat takullugu assini filminilu takunikuusimasannut nallersuuneqarsinnaanngilluinnarpoq, oqarpoq nangillunilu:
- Nangeqattaartuliammi inuttaa Kalaallit Nunaannut tikimmat qanoq alutorsartiginera, killitsinera tupigusunneralu misigimmagit qujamasunnartorujussuuvoq - ilungersorujussuanngikkaluarlungami misigissutsit taakku pigaakka. Kalaallit Nunaanni akornutituaq tassaavoq angerlamut timmisartulereerluni uterusunnarsereertarmat.
AAMMA ATUARUK Filmiliortartut siulittaasuat: Danskit qulliuniartut kisimik oqaluttuarisaanerput unikkaassanngilaat
Isiginnaagassiami 'Borgen'-imi immikkoortortat nutaat allat isiginnaagassiami tassani aallakaatereernikut assigalugit Adam Pricemit allanneqarput.
Netflix suleqatigalugu isiginnaagassiortarfik piginneqatigiiffik SAM Productions Danmarks Radio peqatigalugu isiginnaagassiat Per Fly ilitsersuisuuffigai.
Kalallit Nunaanni immiussinermi SAM Productions Polarama Greenland suleqatigaa.
