Isiginnaagassiortup oqaluttuatoqqat uummaarissunngortikkai: Oqaluttuatsialannik toqqorsimasoqarpoq

Danskip nakorsap Pituffimmi piniariarnermi nalaani 1940-kkunni ajunaarnerata kingorna suliassaqangaatsiarsimavoq.

Tamanna isiginnaagassiap titartagalersukkallu naatsup, Mikael Lindskov Jacobsenimit suliarineqartup ilisaritinneqarnerani oqaatigineqarpoq.

Isiginnaagassiaq naatsoq – Oqaluttuat uummaarissut: Pituffimmit nakorsaq-mik ateqarpoq.

Mikael Lindskov Jacobsenip Arktisk Insitutip nipinik immiussanik toqqorsivianit immiussatoqaq atorlugu isiginnaagassiaq naatsoq titartagalersorpaa. Nipimi immiussami Agnete Drosvadip Andreas Drosvadillu nakorsaq Pituffimmi ajunaarsimasoq oqaluttuaraat. Immiussaq 1980-ikkunneersuuvoq.

Oqaluttuami danskeq nakorsaq qimussinik ajunaarsimasoq oqaluttuarineqarpoq, taassumalu ilaqutaasa Københavnimut nassiunneqarnissaa ilineqarnissaalu kissaatigisimavaat.

Pituffimmiilli Københavnimut aqqut pilersaarut malillugu ingerlasimanngilaq. 

Oqaluttuatsialaat toqqortaatigineqartut

30-nik ukiullip, Mikael Lindskov Jacobsenip oqaluttuat soqutiginartorpassuit assigiinngitsuni toqqortaatigineqartut oqaatigaa. Tamannali aanaavani aallartippoq.

- Ukiup ataatsip missaata matuma siorna isumassarsiaraara, tassa aanaannut pulaartillunga immiussanik ulikkaartumik sikaaveqartoq paasivara, immiussanilu Danmarkimit nunatsinniillu radioaviisit 60-ikkunniit immiuttarsimavai.

- Immiussat ilai tusarnaarpakka oqaluttuallu quianartorpassuit nassaaralugit. Oqaluttuat taakku sikaavimmi pujoralannik katersiinnarnera naakkitsaatigaara.

- Kalaallit Nunaat pillugu oqaluttuat uanga tusarsimanngisakka amerlapput. Taamaammat suliniummut uunnga isumassarsivunga.

Isiginnaagassiaq siulleq suliarisarisani nammineq suliniuteqarluni suliaralugu taassuma -oqaatigaa.

- Isiginnaagassiaq naatsuliaq coronap nalaani sunngiffinni suliassaqannginneruffigisanni suliaraara. Isiginnaagassanilli allanik suliaqarnissannut taperserneqarsinnaanissara neriuutigaara.

- Immiussarpassuarnik titartaganngortissinnaasunik nuannerusnik peqareerpunga.

Assersuutigalugu oqaluttuaq Mikael Lindskov Jacobsenip eqqarsaatigisaa 60-ikkunni umimmannik nunatta kitaanut eqqussuilernerannut tunngavoq.

Uani umimmaat Danmarkimi uumasuusivimmi ukeeqqaarlutik nunatta kitaanukaanneqartarnerat oqaluttuarineqarpoq.

- Tassami oqaluttuami umimmaat Danmarkimut qanoq ilillugit assartorneqarnerannut, taakkulu kitaani uumasuunissaminnut sungiussiniarlutik uumasuusivimmeeqqaartarnissaannut tunngavoq.

- Aamma angakkumik naapitsinermut oqaluttuaqarpoq. Kalaallit piorsarsimassusaannut tunngatillugu oqaluttuanik assigiinngitsorpassuarnik saqqummersinneqarsinnaasunik peqarpoq.