Nunatsinni uuliamik nassaarneq pillugu tv-kkut isiginnaagassiaq pissanganartuliaq naliliisartunit nuannarineqartoq
Qeqertarsuup Tunuani uuliamik nassaartoqarpoq. Uuliaqangaatsiarpoq. Allaat nunarput milliardinik isaatitsisinnaalluni – naalagaaffimmiillu tapiissutinut qujaannarnissamut periarfissaqarpoq, taamaalillunilu Danmarkimit kiffaanngissuseqartoqarsinnaalernissaq qanillerpasippoq.
Tamanna Issittoq pillugu – tassa Danmarkip nunattalu akornanni aammali pissaanilissuarnit USA-mit, Ruslandimit Kinamiillu soqutiginninnermut atatillugu aaqqiagiinnginnernik aallarniissutaavoq
Isiginnaagassiami Ujarneq Fleischer, Rasmus Lyberth, Angunnguaq Larsen, Kiki Godtfredsen, Krissie Berthelsen Winberg aamma Nivi Pedersen ilaatigut inuttaapput. Svend Hardenbergilu isiginnaagassiami nunanut allanut tunngasunut aatsitassanullu naalakkersuisutut, Hans Eliassenitut inuttaavoq.
- Isiginnaartut isiginnaagassiaq inuttaaffigalugu qanoq igissaneraat pissanganarpoq, taanna KNR-imut ippassaq oqarpoq.
Naliliisartullu nuannarinnilluarput.
Ulloriaasanit arfinilinnit tallimanik ullorialerneqartoq
B.T-p isiginnaagassiami nangeqattaartumi “isiginnaartitsisartunit takutitsilluarnerpassuit” nersualaarutigai. Naliliisartup ulloriaasanik arfinilinnit tallimanit ullorialerpaa.
Ekstra Bladetip naliliisartua aamma taama naliliivoq, allallunilu ”Borgenimit isiginnaarsimasaminit pitsaanerpaasoq”.
Film pillugu atuagassiap Ekkop immikkoortut pingasut siulliit ulloriaasanit arfinilinnit tallimanik ullorialerpai, Jyllands-Postenip Soundvenuellu arfinilinnit sisamanit ulloriaasalerpaat.
- Kalaallit Nunaanni pissutsit pisimasullu eqqarsaatigalugit uppernartumik pissanganartuliorneqarnera assut torrallataavoq, qularnanngitsumik nangittaqattartuliaq inuit amerlasuut malinnaaffigivaat, Kristian Ditlev ekkofilm.dk-mi naliliinermi allappoq.
Oliefundet åbner ifølge anmelderne for et politisk drama uden sidestykke, hvor både Danmarks forhold til Grønland, forholdet til stormagterne USA og Rusland og klimadebatten kommer på dagsordenen.
Soundvenuemit naliliineq naapertorlugu tv-kkut isiginnaagassiami ministeriunerup ministeriviullu Mette Frederiksenip (S) akornanni assigiissutsit arlaliupput.
Tv-kkut nangeqattaartartumi ministeriuneq ”Mette Frederiksenimut ilaarutilliivallaangajattoq”, naliliisartoq allappoq.
Netfliximiilissasoq
Politikenip naliliisartuata ministeruneq ”Mette Frederiksenimut assingusumik naalakkersuisunut siulittaasuunerarpaa” taassumalu tamanna uummataasanit arfinilinnit pingasunit uummataasalerlugu.
”Borgen” atuakkiortumit Adam Pricemit taassuma atuakkioqataanit Jeppe Gjervig Gramimit Tobias Lindholmimillu allaaserineqarpoq.
Isiginnaasagassiaq nangeqattaartoq matumuuna Netflixip suleqatigeratigut pilersinneqarpoq, taannalu DR1-ikkut aallakaatinneqareerpat Netfliximi isiginnaarneqarsinnaalissaaq.
Isiginnaagassiap immikkoortui siulliit DR1-ikkut 2010-mi 2013-imilu aallakaatinneqarput. Taakkulu sapaatit tamaasa agguaqatigiissillugu 1,5 millioninit isiginnaarneqarlutik.
