Filmi pissanganartuliaa "Idealisten" Kalaallit Nunaanni takuteqqaarneqartussanngorpoq
Filmi "Idealisten", Danmarkip oqaluttuarisaanerani 1900-kkunni pisut isertuussaanerpaat alutornarnerpaallu ilaat 1968-imilu pisimasunik aallaaveqarpoq, tassa amerikamiut timmisartuutaata B-52-ip brintimik qaartartulianik sisamanik useqarluni Pituffiup eqqaani sikumut nakkarnera aallavigineqarluni.
Ilitsersuisoq Christina Rosendahl "Idealisten"-imi ilitsersuisuuvoq, Katuamilu filmertarfimmi marsip ulluisa 19-ianni takuteqqaarneqassalluni.
Aamma atuaruk Filmi Pituffimmi ajutoornermut tunngasoq upernaaru takuteqqaarneqassaaq
Christina Rosendahl filmip takuteqqaarnerani najuukkumaarpoq, inuillu qaaqqusat 500-nit amerlanerusut Katuap filmertitsisarfianut tikilluaqqussavai, qilanaaqaarlu:
- Qujamasuutigeqaara filmip nunarsuaq tamaat takuteqqaarneqarnissaanik tamaani ingerlatsinissarput Katuaq Biop akuersissutigimmagu. Poul Brinkip Pituffimmi sulisartut pillugit saqqummiisarnerata paasinarsisippaa innuttaasut qallunaat kalaallillu Danmarkip atomimik politikkia isertuussaq pissutigalugu ukiuni 40-ni salloqittarneqarsimasut. Aamma Kalaallit Nunaat sammisami uani qitiulluinnarpoq taamaammat "Idealisten" maani takuteqqaassallugu pissusissamisoorpoq, Christina Rosendahl oqarpoq.
Aamma atuaruk Pituffimmi ajutoorneq filminngulerpoq
Danmarkip Radioata tusagassiortua Poul Brink Pituffimmi pisut malinnaavigai, atuakkiaalu "Thulesagen - Løgnens univers", Thule pillugu suliaq - sallup silarsuaa, "Idealisten"-ilu tassannga aamma aallaaveqarluni.
Filmiliaq Katuami tamanut apriilip ulluisa qulingiluaanni.
