Pituffimmi ajutoorneq filminngulerpoq
Amerikamiut timmisartuat B52-eq 1968-imi januaarip 21-ani Pituffiup eqqaani nakkarmat, qallunaat naalakkersuisuinut sulianngorpoq qissaarnartoq. Pisortatigoortumimmi Danmark atomip nukinganik sakkuuteqarfiunngilaq, taamaattumillu timmisartoq brintinik qaartartunik sisamanik usisimanera saqqummiunneqaqqunngilaat.
Filmimut ”Idealisten”-imut takusutissiaq uani takuuk.
Isertuussinerlu taannarpiaq ilitsersuisumut Christina Rosendahlimut oqaluttuassartaanik paasiniaasitsilerpoq.
- Inuit isertuussaqaraangata sallugaangataluunniit alapernaasilertarpunga, taamaammallu oqaluttuarisaanermi pisimasoq una paasisaqarfigissallugu soqutigisimavara, qallunaammi kalaallillu oqaluttuarisaaneranni ataatsimoorussami pisimasuuvoq assuarnartoq, KNR-imut oqarpoq.
Aamma atuaruk Pituffik pillugu siunnersuut akuerineqarpoq
Ajutoornerup kinguneranik arlallit toqupput
Ajutoornerup kingorna ukiut arlallit qaangiummata tusagassiortup Poul Brinkip pisimasoq misissorlugu aallartippaa. Pituffimmi sulisimasunik plutoniumilu pillugu napparsimalersorisimasunik radiokkut ujarlerpoq.
Paasisaalu tupaallannaqaat: inuit 100-t sinnillit toqoreersimapput.
Christina Rosendahlip filmiliaani ”Idealisten”-imik ateqartumi Poul Brink inuttaavoq pingaarneq.
- Filmi Idealistenimik atserpara inuttaq pingaarneq, tusagassiortoq Poul Brink, suliaq ukiut qulit ingerlaneranni paasiniaaffigimmagu. Pissaanillit qanoq pissaaniminnik atuinerat innuttaasut paasissagaat pingaartittorujussuuaa, Christina Rosendahl oqarpoq.
Taarsiineq qaartartorlu alla
Filmip inuttaa pingaarneq alla tassaavoq Marius Schmidt. Ajutoornerup nalaani Pituffimmi qatserisartut ittuat. Ajutoornerup kingorna inuunermi ilarujussua Pituffimmi sulisimasut qimataallu taarsiiffigineqarnissaat sorsuutigivaa.
Pituffimmi sulisimanut naapeqqaarneranni, uillarnerit Pituffimmilu sulisimasut napparsimasut ilaaffigiasaanni, neriorsuisimavunga suliaq naammassitinnagu uninnaviarnanga, tv-qarfimmut 24 Sjællandskemut ukiualuit matuma siorna oqarpoq.
Ullumilu suli naapertuulluartumik naammasisoqarsimanngitsoq Marius Schmidt isumaqarpoq. Pituffimmi sulisimasut 1995-imi taarsiiffigineqaraluarput. Qallunaalli naallagaaffiata akisussaaffini suli nassuerutiginngikkaa isumaqarpoq. Immallu naqqani suli atomip nukinganik qaartartoqarsinnaanera ukkappaa.
- Qaartartoqarnersoq qaartartoqannginnersoorluunniit nalugipput eqqarsarnaqaaq, filminik ilitsersuisartoq Christina Rosendahl oqarpoq.
Aamma atuaruk Olsvigip Lidegaardip Naalakkersuisullu Pituffik pillugu akissuteqarnissaat ujartorpaa
Filmi Danmarkimi Kalaallit Nunaannilu apriilip qulingiluaani takuteqqaarneqassaaq.
- Suliap aallartinneraniilli takorloorsimavarput Kalaallit Nunaanni Danmarkimilu ataatsikkut filmi takuteqqaarneqassasoq, ilitsersuisoq oqarpoq.
Filmimi sammineqartut suli ullumi attuumassuteqarsorai.
Naalagaaffik innuttaasuminut qanoq annertutigisumik salloqqusaanerannik – sillimaniarneq eqqarsaatigalugu – apeqqut soqutiginaqaaq. Taamaattumik ukiut 47-t ajutoortoqarneranit qaangiutereeraluartut akunnattoorfik ullumi suli atuuppoq, soorlu peqqarniisaarniartoqartarnera eqqarsaatigalugu, Christian Rosendahl oqarpoq.
Filmi Nunatsinni Nuummi, Ilulissani, Sisimiunilu filmertarfinni takutinneqassaaq.
