Filmi Pituffimmi ajutoornermut tunngasoq upernaaru takuteqqaarneqassaaq

Pituffiup eqqaani 1968-imi brintbombemik ajutoorneq pillugu qallunaat filmiliaat takisooq upernaamut takuteqqaarneqassaaq.
"Idealisten" om Thule-ulykken i 1968 får premiere i april 2015.
Filmen "Idealisten" får premiere i april 2015. Assi © : hns
decembarip 30-at 2014 15:28
Nutserisoq Erna Lynge

Qallunaap filmiliornermi ilitsersuisartup Christina Rosendahlip DR-imi tusagassiortuusimasup Poul Brinkip atuakkiaa qallunaat naalakkersuisuisa suliaq pillugu isertuussisimanerujussuat filmiliamini sammivaa.

 

Atuakkiaq "Thule-sagen - Løgnens Univers" pillugu Christina Rosendahl taama oqarpoq, atuagaq 2002-mi ikinngumminik tunissutisiarisimasani.

 

Atuakkami 1998-imeersumi DR-imi tusagassiortup Poul Brinkip amerikami sakkutuut timmisartorsuat pillugu paasiniaasimanini oqaluttuaraa. Timmisartoq taanna Pituffiup eqqaani 1968-imi brintbombit sisamat usigalugit nakkarpoq. Ajunaartoqareermat Pituffimmi sulisartut saliitinneqarput.

- Atuagaq taanna pikkugeqaara, Christina Rosendahl KNR-imut oqarpoq.

 

Matoqqasorujussuarmik suliaq

Suliarli taanna qallunaat amerikamiullu naalakkersuisuisa matoqqasorujussuarmik suliarimmassuk - filminik ilitsersuisartoq Christina Rosendahl assut alapernaatsilerpaat.

 

- Tassa inuit isertuussileraangasa alapernaasilersarpunga.

 

Ajornartorsiutinummi ilaavoq, sulisartut saleeqataasimasut ilarpassui ukiut arlallit qaangiummata pissuseqatigiimmik kræftimik nappaateqalersimammata.

 

- Sulisartut naalakkersuisunit misissuiffigineqarusussimagaluarput paasiniarlugu nappaatigisamik saliisimanermillu imminnut atassuteqarnerat. Qallunaalli peqqinnissamut oqartussaasui minnerpaamilluunniit oqaaseqarusussimanngillat, misissuerusussimanngillat oqaloqatiginnikkusussimanatillu. Isumaqarpungalu tamatumarpiaap aallaqqaataaniilli soqutiginnilersikkaanga. Naalakkersuisut innuttaasunik sulisissimasaminnik oqaloqatiginnikkusunngittut.

 

Tamannalu filmiliamik ateqartumik "Idealisten"-imik kinguneqarpoq - Poul Brinkillu sunniutigisimasaa takutissallugu.

 

Qaqugukkut sallusoqarsinnaava?

Aammali qallunaat naalagaaffianut tunngasuuvoq, inuit amerlanerit sianiginngisaannik 40-kunni 50-ikkunnilu USA-mik illersornissamut isumaqatigiissuteqartumut. Aammalu qaqugukkut "sallup immannguaq atornissaa" ajunnginnersoq.

 

- Tassami eqqissineqaannarnissaa isumannaallisaanerlu pillugit qanoq salluliortoqarsinnaava? Tassalu akunnattoorneq taanna soqutiginerpaasimavara. Sallusoqarsinnaava eqqortoq sorsunnermik allatulluunniit uloriarnartorsiornermik kinguneqartitsissappat, imaluunniit naamik? Tassalu apeqqut taanna filmimi apeqqutigineqartoq. Filmimi "Idealisten"imi ilitsersuisoq Chritina Rosendahl oqarpoq.

 

Filmi apriilip qulingiluaani 2015-imi takuteqqaarneqassaaq.